Customs-in an hnena kuhva man lûtah hmunpui thupek angin hma an la ṭhin

Customs Division, Aizawla Assistant/ Deputy Commssioner chuan, police-in dan loa ram dang aṭanga lak luh kuhva rah an man a, Customs hnena an hlanin Shillong-a Customs hmunpui thupek angin hma an la ṭhin tih a sawi.

Customs Division hotute hnen aṭanga Vanglaini thu dawn danin, Customs hian kuhva rah dahna atan Sairang leh Phunchawngah kudam an luah a, kuhva rah a tam tham tawh avangin dahna tur a buaithlak tham hle. Kuhva rah phurhna lirtheite pawh man tel nghal zel a ni.

Kuhva rah man chu kg. khatah Rs 1,000 hisâpa chhût a ni a, cheng nuai 50 leh a aia tamah a phurtu lirthei man tel a nih laiin, cheng nuai 50 man aia tlem phurte erawh chu man tel a ni lo. Kuhva rah neitute chu an phurh zat azirin pawisa chawitir an ni a, an chawi tur zat chu Shillong-a Customs hmunpui aṭangin bituk a ni ṭhin.

Cheng nuai 50 man aia tam kuhva rah phurte chu thubuai siamsakin, Court-in an chungthu a ngaihtuah ṭhin a, lirthei khalhtu zingah kuhva rah neitu tlem azawng an awm a, a tam zawk chu mi chhawr an ni hlawm. Police-in an man kuhva rah neitute chu Mizo deuh vek an ni.

Kuhva rah phurhna lirtheite chu lirthei man hlut záwng aṭanga chhûta 25%-a khultir ṭhin an ni a, lirthei neitute'n thla hnih/khat hnuah an khul chhuak ṭhin.

Customs Division hotute chuan, kuhva rah man a tam avang leh tihral zung zung theih a nih loh avangin a buaithlak hle tih an sawi a, "Kan hmunpui lamin kudam luahna tur min pe ṭha duh si lo nen a buaithlak duh khawp mai," an ti.

Hmunpui lamin tihral dan turah thutlukna an siam ṭhin tih sawiin Customs hotute chuan, "Kuhva rah tihral a nih dawnin, labour man leh JCB hman mante a ngai a, a buaithlak hle," an ti a, kuhva rah chu buaipui tham tak zet a nih thu an sawi a ni.