Aizawl dist-a home/centre 21-ah naupang 435 enkawl mek a ni

Aizawl district-a naupang venhim ngai leh harsatna tâwkte enkawlna hmun 21-ah naupang 435 enkawl mek an ni.

Mizoram State Commission for Protection of Child Rights (MSCPCR) hotute chuan nimin khan Aizawl district-a sorkar leh pawl hnuaia naupang enkawlna hmuna thawkte nen inkawmhona an buatsaih. Ṭhutkhawma tarlan danin, February 2023 thla tàwp dinhmun angin, Aizawl district-a naupang enkawlna home/centre 21-ah naupang 435 enkawl an ni.

Aizawl district-ah naupang venhim ngai leh harsatna tâwk enkawlna hmun 11 a awm a, fa lâk (adoption) theih tur enkawlna hmun pathum, pianphunga rualbanlo enkawlna pakhat, rilru lama harsatna nei enkawlna pakhat, ruihhloin a tihbuai enkawlna pahnih, dan kalha che naupangte enkawl leh kaihhruaina Observation Home, Place of Safety leh Special Home pakhat ṭheuh a awm.

Ṭhutkhawmah hian home/centre hrang hrangte'n khaihlak leh harsatna an tawh theih leh hmachhawn mek te, harsatna hrang hrang sutkian dan tur ruahmannate sawiho a ni.

MSCPCR hian harsatna hrang hrangin a tlâkbuak naupangte himna turin hma a la a, naupangte'n an mamawh ang enkawlna leh kaihhruaina an dawn theih nan hma lain, home/centre-te nen hma an la ṭhin. Tun dinhmunah chairperson pakhat, member pathum, secretary leh thawktu dangte nen mi 19 an thawk mek a ni.