NIT campus chunchanga K Vena zawhna Union Forest Minister-in a chháng

Nimina Parliament session-ah Rajya Sabha MP K Vanlalvena'n Lengpui rama National Institute of Technology (NIT), Mizoram campus nghet chungchanga a zawhna chu Union Envi-ronment, Forest and Climate Change minister Ashwini Kumar Choubey-a'n a chháng.

Union EFCC Minister chuan, Lengpuia NIT permanent campus dinna tura forest clearance pek leh pek loh chungchang zawhna chhangin, "June 13, 2022-a Forest Advisory Committee meeting-in Mizoram sorkar aṭanga ngenna lut chu an thlir tawh a, thil pawimawh dangah Mizoram sorkar aṭanga chhànna nghah mek a ni," a ti.

Mizoram sorkar thu-chhuah tarlan danin, Lengpuia NIT campus din a nih theih nan January 22, 2020-ah Union Cabinet meeting chuan cheng vbc. 669.75 a lo pe (sanction) tawh. NIT campus dinna tur hian cheng vbc. 334.78 hman tawh a ni a, Mizoram EFCC department-in 'Reverine Reserved Forest a ni' tia complaint an neih avangin tun thlengin hna thawh chhunzawm a ni lo.

Sorkar laipuiin sum a pek tawh aṭangin cheng vbc. 334.97 chu khawih chêt theih lohin a la awm ta reng a ni.

Lengpui rama NIT, Mizoram campus-a forest reserve tihchhiat aiah hian Mizoram sorkar chuan hmun dangah forest reserved zau zawk a siam tawh a; Lengpuia NIT hmun forest reserved nena inthleng dilna pawh Mizoram sorkarin sorkar laipuiah January 24, 2023 khan a thlen leh tawh bawk.