Changtlung leh zau zawka health care kalpui turin theihtawp chhuah a ni - CM
National Health Authority (NHA) bultumin nimin khan Mizoram State Health Care Society chuan Aijal Club-ah 'Ayushman Sangam - North Eastern Regional Review Meeting' an buatsaih a; khuallian chief minister Zoramthanga chuan, health care scheme changtlung leh huam zau zawka kalpui turin theihtawp an chhuah zel thu a sawi.
NHA hi Ministry of Health and Family Welfare-in health care scheme flagship programme a siam Ayushman Bharat Pradhan Mantri Jan Arogya Yojana (AB PM-JAY) kalpui tura a ruat a ni a; nimina review meeting-ah hian hmarchhak state tin aṭangin aiawh an tel.
Ṭhutkhawma NHA Additional CEO tarlan danin, hmarchhak state pariat zingah Assam-in AB PM-JAY-a inziak lut mi 30,03,069 neiin, an tam ber a, Sikkim-ah mi 44,228 inziak lutin, an tlem ber. Mizoramah chuan mi 2,16,584 an tel a ni.
CM Zoramthanga chuan, hriselna chu mihring nuna hlu ber zinga mi a nih thu sawiin, "Ram hmasawnna atana thil pawimawh tak a ni. Mi khawsak harsa ber pawhin inenkawlna an mamawh ang an hmuh theihna tura health care scheme changtlung tak neih a pawimawh," a ti a; review meeting chuan hmarchhaka AB PM-JAY kalpui a nih danah hmasawnna a thlen ngei a beisei thu a sawi.
Chief Minister chuan, sorkar laipuiin AB PM-JAY a kalpui hma kum eng emaw zatah Mizoram sorkarin state health care scheme a ruahman tawh thu a sawi a, "Kum 2018 tawp lam aṭang khan tharthawh lehin, tunah chuan sorkar laipui scheme nen kal kawpin, tichangtlung zelin, huam zau zawk leh changtlung zawka buatsaih zel tum a ni," a ti.