MLA hluite'n inkhawmpui an hmang

Former Legislators Association of Mizoram (FLAM) chuan nimin khan Assembly Annexe confe­rence hall-ah General Body Meeting an nei a, minister Dr R Lalthangliana'n khuallian niin a hmanpui. Inkhawmpui thupui chu ‘Ramngaw, nungcha leh tuihna humhalh’ tih a ni.

FLAM inkhawmpui hi an vice president Prof. JV Hluna'n a kaihruai a; khual­lian leh FLAM president Liansuama ten thu an sawi. An member thi pali sûnna hun an hmang a; SIPMIU director Rothanga'n ‘Tuihna humhalh’ tih thupui leh MZU Environmental Science department Prof. Lalnuntluanga'n ‘Ramngaw leh nungcha humhalh’ tih thupui an sawi bawk.

Dr R Lalthangliana chuan, FLAM ṭhutkhawm thupui chu khawvelin tunlaia a buaipui mek a nih thu sawiin, "Eng anga ram ropui pawh ni se, tuihna ṭha an neih loh chuan ram nuam a ni thei lo. Kan thupui ang hian tuihna ṭha kan neih theihna turin kan ṭan tlan a ngai. Kan dam chhung hian mi dang tan kan luan chhuah a pawimawh," a ti a; ram leh ṭhangtharte tan ro tling hnutchhiah ṭheuh tum turin a chah.

FLAM hi kum 1994-ah din a ni a, Mizoram Legislative Assembly kum 50 chhungin MLA 232 an awm tawh a, member 95 an thi tawh a ni.