KHAWTHLIR

John Barla kâwm

Law & Judicial minister TJ Lalnuntluanga chuan nimin khan New Delhi-ah Union Minority Affairs minister of state John Barla chu a pisaah a kâwm a; Champhai tana auditorium, football ground, volleyball indoor stadium leh sports complex tihchangtlunna tur leh hmalak theihna dangte a thlen. John Barla chuan, a ṭul anga hma a lak tur thu a lo hrilh niin sorkar thuchhuahin a tarlang.

Special clinic

Indian Medical Association, Mizoram Government Doctors' Association leh Indian Dental Association-te chuan nimin khan Hnahlan damdawi-in (PHC) leh Hnahlan Higher Secondary School-ah special clinic an buatsaih a, mi 2,000 vel an inentir. He hun hi bialtu MLA Dr ZR Thiamsanga'n a hmanpui a, damdawi sem tur lei nan Rs 1,50,000 a pe a ni.

Police-te'n lawm

Lunglei Police Station chuan nimin khan SP conference hall-ah Ministry of Home Affairs-in Annual Ranking of Police Stations 2022 a neiha ‘Best Police Station of Mizoram 2022’ a dawn an lawm. He hun hi deputy inspector general (Southern Range) H Ramthlengliana'n a hmanpui a, Lunglei PS officer-in-charge inspector LP Zohmangaiha hnenah Certificate of Excellence hlan a ni.

Fimkhur turin chah

Serchhip district bawrhsap Nazuk Kumar chuan, kângmei tichhuak lo tura fimkhur turin Serchhip district mipui a chah a, kângmei chhuak a awmin Fire Station/ District Emergency Operation Centre phone number 222010/ 9862116104-ah hriattir vat turin a ngen.

DGP-in pisa hawng

DGP Devesh Chandra Srivastva chuan nimin khan Mamit Luangpawlah 4th IR Battalion commandant pisa thar a hawng. 4th IR Commandant pisa hi Rs 1,17,45,753 hmanga sak a ni. DGP chuan, ruih theih thil laka fihlim turin police-te a chah a, an fihlim thei dawn lo a nih chuan an hnain a tuar thei dawn tih hre turin a chah bawk.

Kuhva rah man

Khawzawl police-te chuan March 15, Nilaini khan Khawzawl-Rabung kawng an enfiahnaah Myanmar aṭanga dan loa kuhva rah lak luh ip 160 (kg. 12,800) vel an man. Kuhva an mante chu K Lalrawngbawlliana (48), Champhai Venglai khalh truck aṭangin ip 95 leh Malsawmtluanga (23), Ruantlang khalh truck aṭangin ip 65 a ni a, Champhaia Customs Preventive Forces hnenah an hlan a ni.

LMC-ah candidate 42 an awm

Lungleia Municipal returning officer Donny Lalruatsanga leh M Misael te chuan LMC inthlan tura nomination paper-te an endik hnu leh inhnuhdawh hun a tawp hnuah nimin khan candidate list an tichhuak a, candidate mi 42 an awm. March 29, 2023-a LMC inthlanpui hmasa berah hian Indian National Congress, Mizo National Front leh Zoram Peoples Movement ten ward tin (11)-ah candidate an nei a; Bharatya Janata Party-in Ward-2 leh Ward-4 tih loh ward dang pakuaah candidate an nei bawk.