Aizawlah Trade Facilitation Fair neih a ni

Nimin khan Millennium Centre-ah Mizoram Trade Facilitation Fair 2023 ṭan a ni a, Commere and Industries minister Dr R Lalthangliana'n a hawng.

Mizoram Trade Facilitation Fair hi Planning & Programme Implementation department, SELCO Foundation, North East Initiative Development Agency leh Mizoram Science, Technology and Innovation Council-te ṭang kawp buatsaih a ni a, vawiinah chhunzawma khâr a ni ang.

Fair-ah hian ni zung chakna hman ṭangkai a nih theih dan leh hnathawh a tihawlsam theih dante entir a ni a; puanṭhui khawl te, ei tur vawn ṭhatna khawl te, buhhûm ṭhenfaina te, artui awp keuna te, buhpáwl chan sawmna te, la herna khawl te, hmunphiah siamna khawl te, agarbati siamna khawl leh khawl dang dang, a vaiin khawl 25 pho lan a ni.

Dr R Lalthangliana chuan, ni zung chakna chu Pathian thilpek a nih thu sawiin, "Ni zung chakna hi hnianghnâr takin kan nei a, he lai hmuna kháwl pho chhuahte hi awlsam taka hman theih tura duan a ni. Hetiang trade facilitation fair huaihawt a ni hi a hlâwkthlak a, hmalakna pawimawh tak pakhat a ni," a ti a; loneimite pawhin trade fair-a an pho chhuah khawlte chu an ṭangkaipui ngei a rin thu a sawi bawk.

Fair hawnnaah hian Aizawl mayor Lalrinenga Sailo, Planning secretary Lalmalsawma Pachuau leh, Planning, Science & Technology leh MISTIC hotute an tel a ni.