PE department hnathawhte thlir lêt

Power & Electricity minister R Lalzirliana hoin nimin khan Engineer-in-Chief conference hall-ah PE department hnathawhte thlirhona Works Review Meeting neih a ni. Minister chuan, thiamnain eng emaw chenah mi tizahawm mah se, zahawmna tak tak chu mihring nungchangah a innghat ber tih a sawi.

Review meeting-ah hian PE department-in North East Transmission Company (NETC)-a share a lei aṭanga kum 2022-23 chhunga dividend a hlawh chhuah cheng nuai 493.68 chu NETC assstant manager Bikash Kumar Nayak chuan Minister hnenah a hlan a ni.

R Lalzirliana chuan, PE department-a thawkte chu dik tak leh hleih nei loa thawk tura chahin, "Thiamnain eng emaw chen mihring tizahawm mah se, zahawmna tak tak chu mihring nungchangah a innghat ber. Tunlaiah kawlphetha tel loin eng hna mah a thawh theih loh tih hial a nih tawh avangin power supply pek tur a pung tulh tulh a, staff indaih lohna karah hnathawh tur tam zel hi PE department hnuaia hnathawkte tan chona ni se," a ti.

Tun dinhmunah Mizoramin kawlphetha a hmu ṭha tih sawiin Minister chuan, "Inhmakhua nacháng hria a, transformer thar bunna hmun tur zawn chhuahah in taimakna a fakawm hle. Thingtlang lamah pawh sorkar hnathawh a lang ṭan viau tawh a, ram neitu thinlung tak tak pu chungin hnathawk zel ang che u," a ti a; bahlah loa mipui mamawh phuhrûk a nih theih nan theihtawp chhuah zel turin a chah.

PE engineer-in-chief Lalhmingliani Hmar pawhin thu sawiin, kawlphetha pek chhuah ṭhat chu department tum a nih rualin, sum lak luh (revenue) chu department hlawtlinna tehfung pawimawh a nih thu a sawi.