Lengpui Airport trolley leina atan restricted tender chhuah a ni - ZPM Ṭhalai

ZPM Ṭhalai chuan thu-chhuah siamin, Lengpui Airport-a khualzinte hman tur nawrlirh (luggage trolley) leina atan pakhatah Rs 24,600 hman a ni chu to uchuak hlea an ngaih thu leh, trolley leina turin February 6, 2023 khan restricted tender chhuah a nih thu an tarlang.

ZPM ṭhalaite'n RTI Act hmanga an zawhna GAD Aviation Wing-in an chhàn dânin, February 26, 2020 khan Lengpui Airport-a hman tur nawrlirh 50 lei a ni a, pakhat Rs 24,600 hisápa lei niin, nawrlirh petu (supplier) chu RR Enterprise, New Delhi a ni.

Lengpui Airport-a hman tura nawrlirh 50 an lei ang chu a man pangngai Rs 5,000 a tling lo tih sawiin ZPM ṭhalaite chuan, "To uchuak tak maia supply a ni hi puanhnuai thil a awm ngeiah kan ngai. MNF sorkarah man to tak taka bungraw supply a ni ṭhin hi pawi kan ti a, an sorkar hmasaka police mawza man to leh ek-in kal theite pawh mipuiin an la theihnghilh hmaa airport trolley man to min han hlui leh ta hi mipui zah lohna lian takah kan ngai," an ti.

ZPM Ṭhalai chuan, to taka lei nawrlirhte chu Lengpui Airport chei ṭhatnaah hman chhiat deuh vek a nih thu sawiin, "Tunah hian sorkar chu a thar lei tura inruahman mekin, restricted tender chhuah a ni a, thil fel lo lian tak a inphúm ru leh ngei ang tih kan ring," an ti a; tender chhangtu leh chhàn a nih dan te, nawrlirh mante chu uluk takin a thlithlai zui dawn tih an tarlang a ni.

GAD (Aviation Wing)-in February 6, 2023-a tender notice a chhuaha a lan danin, Lengpui Airport-a hman turin nawrlirh 100 lei tum a ni a, tender chhuah chu restricted/limited tender a ni.