Mamit police DEF silver jubilee lawm

Mamit police, District Executive Force (DEF) chuan nimin khan SP conference hall-ah an din champha kum 25-na an lawm a, DGP Devesh Chandra Srivastava-a'n a hmanpui. DGP chuan, police-te chu dan leh thupek kengkawhtu an nih avangin, mahni duh dana dan kengkawh lo turin mipui a chah.

Mizo hmeichhe tam takin police an zawm chu lawmawm a tih thu sawiin DGP chuan, "Police station-a Women Helpline chuan nunaute laka rîkrum thleng ṭhin a tihtlem ka beisei. Police-te hi dan leh thupek kengkawhtu an ni a, mipuite'n misual hremna kawngah anmahni duh dana dan an kenkawh loh a ṭul," a ti.

DGP chuan, Mamit district chu international border leh inter-state border nei a nih angin police-te chu an pawimawh zual tih sawiin, "Remna leh muanna a awm theih nan in hnaah theihtawp chhuah ang che u," a ti a; Mamit district-in hma a sawn theih nan remna leh muanna kengkawh chunga hma la ṭhin turin DC leh SP a chah.

Ruihhlo ngaite chu misual anga en lo a, harsatna tâwk anga ena theihtawpa ṭanpui turin DGP chuan kal khawmte a chah a; ruihhlo zuarte erawh chu jail-a dah an nih ngei theih nan an theihna zawng zawng bakah khawtlang hruaitute nen ṭanghoa hma la turin a chah bawk.

Mamit SP Office hi March 11, 1998-ah din a ni a, LT Hrangchal, IPS (Rtd) chu SP hmasa ber a ni. Mamit SP hnuaiah hian police sub-division pathum, police station panga, outpost pakhat leh border outpost 10 a awm mek a ni.