Cheng vbc. 1.73 eirûk thubuaiah Officer 2 thiam loh chantir an ni

Serchhipa Excise & Narcotics department pisaa sum eirûk thubuaiah eirukna a thlen laia Excise superintendent Rongura leh Serchhip Treasury Office-a assistant account officer Suakngura te chu Special Judge (Prevention of Corruption Act) Dr HTC Lalrinchhana chuan nimin khan thiam loh a chantir a; anmahni hrem dan tur chu March 20, 2023-ah puan a ni ang.

Special Judge sawi danin, thubuai in ṭanna chu Comp­troller & Auditor General (CAG) report-ah Serchhipa Excise office-ah sum hman dik loh report a awm avangin Anti Corruption Bureau (ACB)-ah FIR thehluh a ni. ACB chuan chhui chiangin, CAG report-a eirukna awm tarlan aia tam eirûkna an hmu chhuak a, sum eirûk an hmuh chhuah zat chu Rs 1,81,58,871 a ni.

Serchhipa Excise Superinten­dent hian kum 2011 aṭanga 2017 thleng khan salary bill 106-ah staff-te hlawh ngai renga siam siin, grand total-ah an ziah belhtir ṭhin a, dik lo taka bill an siam zawng zawng chu cheng vbc. 1.81 a ni. He thubuaiah hian ACB chuan Rongura, Suakngura leh bill siamtu cashier Sainguri Chenkual te lakah thubuai an ziak lut ta a ni.

A hnuah Special Court chuan Sainguri Chenkual chu thuhretu (witness)-ah a hmang a, bill-te chu Excise superintendent Rongura tihtir niin a sawi. Sainguri Chenkual account-ah hian pawisa lut ve tho mah se, Rongura'n office mamawha hman tur pea a insawi avangin finfiahna (evidence) a awm loah ngaiin chhuah zalen a ni.

Cheng vbc. 1.81 aṭang hian Serchhipa Excise office tan cheng nuai 8.56 hman a ni tih finfiah a ni a, a bak cheng Rs 1,73,48,365 chu eirûk niin, chumi thubuaiah chuan Rongura leh Suakngura te chu thiam loh chantir an ni ta a ni.

Cheng vbc. 1.73 aṭang hian Rs 41,000 chu Suakngura account-ah thun (transfer) a ni a, Special Court chuan heng sum eirûknaah hian Rongura leh Suakngura chu thawk dunah a ngai.

Special Court chuan, sum dik lo taka hmuh ni tho mah se, office atana cheng nuai 8.56 hman ral chu departmental inquiry anga kalpui tur chi-ah a ngai thung.

Suakngura leh Rongura te hi Special Court thu angin police-in an man nghal a, nimin khan Central Jail-ah dah luh an ni. Hrem an nih dan tur March 20, 2023-ah puan a ni dawn a, chutah chuan anmahni pawh Court-a inlan leh tura tih an ni.