Myanmar ráltlân mi 5,191 awm mek; Ráltlânte ṭanpui turin Mizo mipui ngen

Zo Reunification Organisation (ZORO) hruaitute chuan nimin khan Aizawl Press Club-ah thuthar thehdarhtute an kâwm a, Myanmar aṭanga sahimna zawnga ráltlân Mizoramah mi 5,191 an awm mek thu sawiin, Myanmar leh Bangladesh ráltlân Mizorama lutte ngaih-sak thar leh turin Mizo mipui an ngen.

ZORO president R Sangkawia chuan, Mizoram Legislative Assembly pariatna session vawi 11-naah ráltlânte a ṭul ang zela tuamhlâwm chhunzawm a, an awmna tur leh an mamawhte ngaihtuah zel tura resolution an pawm chu lawmawm an tih thu a sawi a, "Hei hi sorkar leh Zoram mipuiin a taka kan thlentir a ṭul. Ráltlânte ni tin khawsakna ngaih-tuahsak a ṭul hle a ni," a ti a; Mizoram sorkar hmalakna ṭawiawma tichak turin ZORO-in ZORO Sub-Committee on Refugee an din thu a sawi.

Sub-Committee on Refugee-in Aizawl, Lunglei, Champhai leh Hnahthial district-a ráltlânte dinhmun an zir chian tawh thu sawiin ZORO hruaitute chuan, "District paliah hian ráltlân camp 98-ah ráltlân chhungkaw 1,239 awmin, mi 5,191 an awm mek," an ti.

R Sangkawia chuan, ráltlânte ni tin mamawh zingah hian buhfai, chawhmeh leh damdawite an mamawh zual thu sawiin, "Aizawl district-a Nghalchawm camp-ah phei chuan buhfai an nghei ṭêp a, a bul hnai khuaah ráltlân chhungkaw tina kg. 2 zela sem turin buhfai an dil hman hial," a ti a; camp dangah pawh harsatna hrang hrang tâwk mai thei an nih thu a sawi.

ZORO President chuan, Mizoram sorkar, mipui, kohhran leh pawl hrang hrangin kum hnih vel ráltlânte an ṭanpui tawhna chu lawmawm an tih thu a sawi rualin, tunah chuan ṭanpuina hi a kang chat ṭan tih a sawi a; an awmna bialtu MLA leh bawrhsapte'n ṭanpuina hrang hrang an pekte chu a tâwk zo lo tih sawiin, "Theihtawp chhuaha Mizo mipuiin chhawmdawlna leh ṭanpuina kan pek leh a ngai. An awmna ramah an la haw theih loh avangin an dinhmun a la harsa reng a ni," a ti.

Ráltlân zingah inhlawh theite'n inhlawhna hrang hrang hmu tawh mah se, camp-a la awm nunau leh upa lam eng emaw zatte'n awmhmuna an tih theih tur inhlawhna an mamawh thute ZORO hruaitute chuan an sawi bawk.

ZORO Sub-Committee on Refugee-ah hian chairman chu F Ngurbiakvela, ZORO vice president ni mek a ni a, secretary chu Dr Lalrinawmi Ralte niin, member dang panga an awm a ni.