Naupang venhim ngaite chungchang sawiho

Mizoram State Commission for Protection of Child Rights (MSCPCR) leh Child Welfare Committee (CWC) Aizawl district hotute chu nimin khan MSCPCR Conference Hall-ah an ṭhukhawm a; a bika enkawl, chhan-chhuah leh venhim ngai naupangte chungchang an sawiho.

Inkawmhonaah hian child care institution (CCI)-a naupang dah luh dan leh chhungkuaa an lêt leh dana hmasawnna awm theite sawiho a ni a; CCI-a naupang awmte'n zirna an dawn a khaihlak lohna turin a ṭul anga hmalak tlan ni se an ti.

Naupangte'n an sikulah harsatna an tâwk emaw, dan nena inrem loa khawsa an awm a, naupang tana ṭha thei ang bera hmalak a nih theih nan sikulah inzirtirna (awareness) nasa zawka kalpui dan ngaihtuah ni se an ti a; Protection of Children from Sexual Offences Act, 2012 (POCSO) case la chinfel loh chungchangah, a rang thei anga chinfel a nih theih nan hmalak zui an rél.

MSCPCR leh CWC-te'n a ṭul dan azirin joint inspection/visit neih ṭhin ṭha an ti a; naupang ṭanpui ngaite leh humsual dáite'n an chanvo an chan ngei theih nan a ṭulna apiangah thawhho zel ni se, an ti bawk.

Ṭhutkhawm hi MSCPCR chairman Dr C Lalsangzuala'n a kaihruai a, MSCPCR member-te bakah, CWC chairman Lalbiakzama leh CWC member pali - Malsawmthangi, K Lalremruati, Lal-lianmawia Tlau leh Robert Lalduhzuala te an tel.