Mi 14,217-in ART an la mek; ART damdawi tlâkchham a awm lo

Mizoram State AIDS Control Society (MSACS) chuan thuchhuah siamin, HIV veite enkawlna damdawi, anti retroviral therapy (ART)-ah harsatna a awm loh thu leh Mizoramah HIV vei mi 14,217-in ART an ei mek thu an tarlang.

MSACS tarlan danin, Mizoramah HIV vei mi 27,876 hmuh chhuah a ni tawh a, chu'ng zinga 22,498 chu ART centre-ah an inziak lut tawh. HIV/AIDS leh a kaihhnawih natna vangin mi 4,005 an thi tawh a ni.

MSACS chuan, tun hnaiah hmarchhak state hrang hrangah ART damdawi chatlak avangin HIV vei, ART eite'n harsatna an tawk anga sawi awm chu thu dik lo a nih thu an tarlang a, "ART damdawi chatlak anga thuthang awm, AL-Adult damdawi hi kan tlachham lo a, naupang ei tur puitlinga pek a ni lo," an ti.

MSACS tarlan danin, ART damdawi chi hrang hrang a awm a, Mizoramah Abacavir leh Lamivudine chawhpawlh AL-Adult damdawi ei lai mi 76 an awm. AL-Adult chu damdawi chawhpawlh (regimen) thar TLD ei thei lote hnenah chauh pek a ni.

Tun dinhmunah Mizoramin AL-Adult damdawi chu thla khat ei aia tam an la nei a, ATV/r damdawi pawh ART centre hrang hrangah thla ruk aia tam tla a la awm a ni.

AL-Adult damdawi chu Assam SACS-in an tualchhung suma an lei mûm 7,500 vel Maharashtra aṭangin thawn chhuah a ni tawh a, sorkar laipui aṭanga AL-Adult supply pawh March thla laihâwl velah SACS-te hnen thleng tura beisei a nih thu MSACS chuan an tarlang.

Harsatna awm palh thei laka inven nan MSACS chuan December 2022 khan AL-Adult damdawi a lo lei lâwk tawh.

Mizoramah HIV vei zinga mi 14,217-in ART damdawi an ei mek a, chu'ng zinga 482 chu naupang an ni.

MSACS chuan, ART damdawi chatlak ang leh HIV veite'n harsatna an tâwk anga thuthang awm chu pawi an tih thu tarlangin, thu belhchian dâwl lo a ni tih hre turin mi tin an chah.