KHAWTHLIR
LMC sum endik
Accounts & Treasury department hotute chuan nimin khan Lunglei Municipal Council (LMC) inthlan tura candidate-te sum sèn dan an endik a, endik vawi khatna a ni. LMC inthlanah hian candidate pakhatin Rs 1,00,000 thleng an hmang thei a; sum an hman dan vawi thum endik tur a ni.
Kawng thawm tha
Bazar Bungkawn leh Sikulpuikawn inkar kawngpui chu nizan aṭang khan siamṭhat ṭan a ni a, hna thawh zawh hma chu zan tin dar 8 aṭanga a tuk zing dar 5 thleng kawngpui chanve khâr a ni dawn. Hnathawh tibuai thei turin lirthei leh bungrua dah phal a ni lo.
MLA-in pe
Aizawl North-II bialtu MLA Dr Vanlalthlana chuan nimin khan a bial chhunga Health sub-centre leh library-te a tlawh. MLA hian sub-centre hnenah MLA fund hmanga a lei hemoglobin (HB) endikna, blood pressure endikna, dopler (naute lungphu enna) leh inbûknate a pe a; MLA fund hmanga din Ramhlun Vengthara Specialised Library pawh tlawhin, lehkhabu eng emaw zat a pe a ni.
CM-in bial tlawh
Chief minister Zoramthanga chuan nimin zing khan a bial, Aizawl East-I chhunga Muthi, Muanna Veng leh Zuangtui a tlawh a, khawtlang hruaitute'n hmalakna leh hmasawnna ruhrel din tur pawimawh an thlente a en. CM chuan, SEDP hnuaia chhungkaw 60,000 thlante bakah, a thawh hnihnaah chhungkaw 60,000 bawk ṭanpuina pek turin thlan leh tum a nih thu a sawi.
MADC electoral roll
Siaha district election officer Lalhmunsanga Hnamte, bawrhsap chuan nimin khan Mara Auto-nomous District Council hnuaia village council 99 inthlannaa hman tur electoral roll a tlangzarh. Siaha district-ah hian chhungkaw 12,091 an awm a, voter mipa 20,794 leh hmeichhia 22,326 awmin, an vaiin voter 43,120 an ni a; mipa aiin hmeichhia 1,532-in an tam a ni.
Customs Assistant Commissioner ni lo
Kuhva rah man Customs hnena lût chungchang nimin March 17-a chhuak Vanglaini a tarlanah, Customs Assistant Commissioner hnen aṭanga thu dawn anga tarlan chu designation inhriat fuh loh a ni a, thu dawnna hi Customs Assistant Commissioner a nih loh thu Customs Division, Aizawl aṭangin dawn a ni. Customs Assistant Commissioner leh chhiartute hriatthiamna leh ngaihhnathiamna kan ngen e.