132 KV sub-station zawh thuai phût

Mamit District Ṭhalai Pawl hruaitute chuan nimin khan West Phaileng leh Bairabi inkara 132 KV sub-station siam mek an tlawh. Bairabi-West Phaileng via Mamit transmission line siamna tur sum awm sa vek a ni chunga tun thlenga siam zawh a la ni lo chu hriatthiam harsa an tih thu an tarlang.

MDṬP chuan, 132 KV sub-station siam zawh har a ni chu, "Power & Electricity Mamit Division EE inthlahdah vang leh hna ngaihtuah tâwk loh vang a ni," an ti a; a rang thei ang bera zawh a nih theih nan 132 KV sub-station experience nei ṭha leh a ngaihna hria EE dah turin Mizoram sorkar an ngen. Mamit district pum huap project lian khawih a nih mek laia PE Mamit Division-a SDO chu thlâktu awm loa sorkarin a sawn chu an hriatthiam loh thu sawiin, rang taka SDO dah turin Mizoram sorkar an phût.

Mamit District Ṭhalai Pawl chuan, an beisei anga sorkarin hma a la lo a, an ngenna ngaih pawimawh a nih loh chuan Mamitah kawngzawh huaihawt an tum thu an tarlang bawk.

MDTP tarlan danin, 132 KV sub-station Bairabi-West Phaileng via Mamit transmission line hi April 19, 2018-ah siam ṭan niin, February 2022-a zawh tura tih a ni a; tun dinhmunah 70% vel chauh thawh zawh ni tawhin, cheng nuai 5,495 chuang ruahman a ni.