Zorinpuiah border trade din tum rih lo

Union Commerce and Industry minister Anupriya Patel chuan Parliament session neih mekah nimin khan Tlabung bul Kawrpuichhuaha Bangladesh nena insumdawn tawnna atan cheng vbc. 552.25 ruahman a nih thu a sawi a; Zochachhuaha Zorinpuiah border trade centre din tumna a awm rih loh thu a tarlang bawk.

Anupriya Patel-i hian nimin khan Rajya Sabha MP K Vanlalvena zawhna a chháng a; Kawrpuichhuaha Bangladesh nena insumdawn tawnna atan cheng vbc. 552.25 ruahman a nih thu a sawi rualin, Mizoram leh Bangladesh dawh zawmtu tur Kawrpui lui chunga lei (bridge) dawhna tur DPR siam chu Bangladesh sorkar kutah dah a nih thu leh Bangladesh-in DPR an la siam zawh loh thu a tarlang.

MP K Vanlalvena'n Lawngtlai leh Paletwa inkara kawngpui sial mek, Kaladan Multi Modal Transit Transport Project (KMMTTP)-ah Mizoram leh Myanmar inrìnaa sumdawnna hmun tura ruahman Zorinpuiah border trade centre din tumna a awm leh awm loh a zawhna chhangin Commerce and Industry Minister chuan, "Kawngpui laih hna hi thawh mek a la nih chauh avangin Zorinpuiah border trade din tumna a awm rih lo," a ti.