'Thenzawl Calling' application tlangzarh

Tourism minister Robert Romawia Royte chuan nimin khan Sec-retariat conference hall-ah phone aṭanga Thenzawl khuaa hmunhma hrang hrang virtual reality (VR) hmanga chhim theihna tur, 'Thenzawl Calling' application a tlangzarh. Application hi Google Playstore leh Apple app store aṭangin lak (download) theih a ni.

Tlangzarh inkhawm hi Tourism secretary Manisha Saxena-i'n a kaihruai a; Robert Romawia chuan, Thenzawl Calling chu Aizawl leh thingtlangte tan hmasawnna thlentu a nih a beisei thu sawiin, "A ṭangkaina leh ṭhatna chu thuah hnih a ni a, khawvel mite mithmuha Mizoram pho chhuahna remchang a nih rualin, sumdawngte tan hlâwkna leh hmasawnna a thlen thei dawn a ni," a ti.

Hleihluak taka sumdawnna vangin khawvela hnam hrang hrangin an hnam ziaráng leh kalphungte bakah, an ram thlengin an chàn tawh thu sawiin Minister chuan, "Chutiang laka Mizoram chhanhim leh humhalh chu 'The Mizoram Responsible Tourism Policy' thil tum pawimawh a ni a, ram leilung neitute humhalh a, eizawnna tlak zawk an neih theih nana puih hi Tourism department thil tum a ni," a ti a; zin mite tan Mizoram chu ram nuama siam turin kal khawmte a chah.