Sorkarin sum leh páiah harsatna a tâwk tih hi kan sawi harsat chawp a ni lo - MNYF President

Mizo National Youth Front (MNF ṭhalai) president Dr L Thangmawia, MLA chuan, Mizoram sorkarin sum leh páiah harsatna a tâwk tih chu an sawi harsat chawp a ni lo a, a takin sumah sorkar a harsat thu a sawi.

Nimina Mizo Hnam Rûna inkhawmah thu sawiin Dr L Thangmawia chuan, sorkar hmasa hnathawh bak eng emaw zat MNF sorkarin a thawk zawm tih a sawi a, "Sum leh pai harsatna kan tawh zawng zawng hi kan sawi harsat chawp a ni lo. A takin a harsa tak tak a ni," a ti.

Dr L Thangmawia chuan, MNF party chu Pathian thu leh ram leh hnam innghahna hmanga din a nia sawiin, "Kalphung nghet tak nei a ni a, hun harsa vawi eng emaw zah tâwk mahse Pathianin a khai ding zel a ni," a ti a; MNF president Zoramthanga chungchangah, "Sawi-selna tam tak karah rilru lam en ṭhintu Pathian hian a kaihhruaina hnuaiah hneh takin sorkarna min pe leh ngei dawn a ni tih hi i ringhlel lo ang u," tiin a sawi.

MNYF President chuan MLA inthlanpui awm tur chungchang sawiin, "Kumin February thlaa hmarchhak state pathum inthlannaah Nagaland-ah Congress an nil a, Tripura-ah seat 3 lain, Meghalaya-ah seat 5 an la pha ṭawk. Mizoram inthlanpuiah pawh Congress hi an nil mai ang tih hlauhthawnpuiawm tak an ni," a ti a; "ZPM pawh an phûr viau a, an din hnu rei lo têah kawng hrang hrangin Mizote hmaah an inzuar a, tunah chuan an sawihnâwm ṭhin kawng an zawh mek a ni," a ti.

Dr L Thangmawia chuan, March 29, 2023-a Lunglei Municipal Council inthlanah Lunglei mipuiin MNF party an sorkartir ngei a beisei thu a sawi bawk.

Inkhawmah hian MNF party zawm thar mi 47 lawm luh an nih thu MNYF thuchhuah chuan a tarlang.