2022 chhungin Lunglei dist-ah thubuai 205

Lunglei district-ah police-te'n kum 2022 chhung khan thubuai 205 an ziak lut a, chu'ng zingah chuan court-a chargesheet thehluh tawh 150 leh court-in a chinfel tawh 120 a awm a, thiam loh chantir 111 (95%) a awm.

March 17, 2023-a Lunglei SP conference hall-a District Crime Review Meeting-a tarlan danin, kum 2022 chhunga Lunglei district-a thubuai ziah luh 205 aṭanga thil bo hmuh lêt zawng zawng chu Rs 90,17,760 hû a ni a; traffic dan bawhchhiate pawisa chawi tling khawm chu Rs 5,01,450 a tling.

January 1, 2023 aṭanga March 17, 2023 thlengin Lunglei district-ah thubuai 47 ziah luh a ni tawh a, thih dan pangngai loa thi (unnatural death) thubuai pali a tel. Thubuai 47 zinga 21 chu court-ah chargesheet thehluh a ni tawh.

Heroin (no. 4) kaihhnawih thubuai pahnih awmin, chumi kaihhnawiah chuan mi pasarih man an ni a; heroin man zawng zawng chu kg. 3.620 niin, international market-ah Rs 11,73,11,000 hû a ni. Kumin chhung vêkin traffic dan bawhchhiate sum chawi zat chu Rs 3,08,109 a ni.

Ṭhutkhawm kaihruaitu Lunglei SP Rahul Alwal chuan, kum 2022 chhungin Lunglei district-a thubuai thehluh aṭanga thiam loh chantir zat (case conviction rate) a ṭha thawkhat tih a sawi a, "Hei hi Lunglei police leh court-a hnathawkte bakah, pawl hrang hrang leh mipui ṭawiawmna leh inpekna rah a ni," a ti.

Rûkrûk thubuai leh NDPS thubuai a hluar zel loh nan mahni inah a theih anga tam CCTV vuah turin SP chuan mipui a chah a; lirtheia chetsualna a pun zel loh nan traffic rules ngai pawimawh tur te, fûr thleng turah khuarel chhiatna thleng thei laka fimkhur tur te, Lunglei Municipal Council inthlan awm tur chu muanawm tak a zawh a nih theih nan police-te ṭha taka thawhpui turin mipui a chah bawk.

Ṭhutkhawmah hian Lunglei Addi­tional SP, SDPO te, police station officer incharge te, investigating officer-te bakah, District Crime Branch, District Special Branch, Prosecution Branch leh Traffic Branch officer-te an tel a ni.