KHAWTHLIR

Lehkhabu lehlin

Mizo Writers' Association chuan kum 2022 chhunga ṭawng danga lehkhabu chhuak, Mizo ṭawnga lehlin zinga ṭha ber an thlanna kal mekah a ṭha zual pathum an thlang chhuak tawh a; chu'ngte chu Lalzarzova Khiangte lehlin 'Jungle Lore' tih te, Sangzuala Pachuau lehlin 'Pasalṭhate lu nghahna' tih leh, Rev. HL Thianghlima lehlin 'Phum tura hriak thih' tihte a ni.

EFCI Assembly

Evangelical Free Church of India (EFCI) chuan March 14, 2023 aṭang khan Saipum kohhran biak-inah General Assembly vawi 50-na an hmang a, nizan khan a ṭiak. Inkhawmpui thupui chu 'Pathian thu a taka hlen chhuah' tih a ni a, Thawhlehni aṭanga Inrinni thleng khan rorel a ni.

Kuhva rah man

Champhai police-te chuan March 17, 2023 khan Khankawn checkgate-ah lirthei pahnih, Lalnunpuia (25) leh Lalmuanzova (25), Ruantlang, Champhai ve ve nia inchhálte khalh aṭangin Myanmar aṭanga dan loa lak luh nia hriat kuhva rah ro ip 120 (kg. 9,600 vel) an man. Kuhva rah mante chu Champhaia Custom Preventive Force hnenah hlan a ni.

Film tlangzarh

Art & Culture minister R Lalzirliana chuan March 17, 2023 zan khan Vanapa Hall-ah 'Black Rose' film a tlangzarh. Minister chuan, Mizo film tam takah Mizo nun dan leh ziaráng tarlanna a tam tâwk lo tih sawiin, Zo ze mawi leh ziarâng tarlang thei film tam zawk siam turin film buatsaih ṭhinte a ngen a; "Hnam dang kawppuia thlan hi hnam ralna pakhat a nih avangin kawppui thlan kawngah hnam anga ṭhan harh a ṭul," a ti.

Hnehna kawnghren

Zothanmawia lehkhabu ziah, 'Hnehna kawnghren' tih chu March 18, Inrinni khan Mizo Award 2022 dawngtu Dr Tawnenga, Mizoram Christian College principal ni bawkin Pachhunga University College seminar hall-ah a tlangzarh. Lehkhabuah hian hlahril (poetry) 60 leh thutluang (prose) 10 a awm a ni.

Kuthnathawktute zirtir an ni

ICAR - National Bureau of Plant Genetics Resources, Pusa, New Delhi mithiamte chuan March 17, 2023 khan Lengpuia Krishi Vigyan Kendra (KVK) an tlawh. ICAR - National Bureau of Plant Genetics Resources-a mithiamte hian kuthnathawktu mi 150 hnenah ei leh bara intodelhna tur te, eitur hrisel leh chakna pai tam ei pawimawhna te, natna dotu chakna pai tam thlai ei tam a ṭul thute an hrilhfiah a ni. Kuthnathawkte 150 te hi vermicompost siamna tur vermi bag leh iptepui pek an ni.

Offset press thar

Mizoram Science, Tech-nology & Innovation Council (MISTIC) leh Mizoram Press Owners' Association hmalaknaa Phunchawnga color web offset press bun thar chu nimin khan State Planning Board vice chairman Dr Kenneth Chawngliana'n a hawng.

DICSC hawng

Mamit bawrhsap K Laltlawmlova chuan nimin khan DC conference hall-ah Digital India Common Service Centre (DICSC) a hawng. Mamita DICSC hi hmarchhak state-a awm chhun niin, Ministry of Electronics & Information Technology hnuaia pilot project a ni a; thingtlang kilkhawra awmte'n service ṭha leh hamṭhatna an neihte an hriata an dawn theihna tura ruahman a ni.