Model Code of Conduct bawhchhiaah Congress party-in Minister an puh

Congress party chuan minister Lalchhandama Ralte, MNF adviser chu LMC inthlan tura Zobawka a campaign-naah SEDP sem chungchangah Model Code of Conduct bawhchhiaah an puh.

MPCC thuchhuah chuan, Lalchhandama Ralte-in Lunglei Municipal Council ward 11-na, Zobawka MNF campaign office hawnnaah kumin March thla chhungin SEDP second instalment sem tum a nih thu leh second phase pawh kalpui nghal tur anga a sawi thu March 16, 2023 khan ZONET JB-in a puang tih a tarlang a, "Model Code of Conduct bawhchhiatna chiang tak a ni," a ti.

MPCC chuan, "Kohhrana rawngbawltu upa atana thlan tlin meuhte'n politics a nih avanga sorkar dan palzût an hreh lo ṭhin hi Mizoram politics tihchhiat zelna a nih avangin, hetiang thil a thleng hi pawi kan ti hle a ni," an ti a; LMC inthlan tur avangin March 2, 2023 aṭangin LMC huam chhungah Model Code of Conduct hman a ni tih hre turin Lalchhandama Ralte an chah a ni.

Dan bawhchhiatna a ni tih hre reng chunga minister Lalchhandama Ralte-in thu a sawi chu Lunglei mipui zahlohna leh thamlohnaah an ngaih thu sawiin MPCC chuan, "MNF party-in an intiamna chêng nuai 3 pawh an pek theih loh laia LMC inthlan tura SEDP sem tur anga minister-in a sawi hi zahthlak kan ti hle," an ti a; LMC inthlan turah SEDP an tawktarh dan chu mipui rilru hruai sual pawisak lohna lian taka an ngaih thu an tarlang bawk.