Engmah hlauhthawn tur a awm lo

MNF adiviser leh Aizawl East-II bialtu MLA Robert Romawia Royte, minister of state ni bawk chuan nimin khan Mizo Hnam Rûna inkhawmah thu a sawi a; office of profit avanga MLA aṭanga bàn tura ECI-a thu thlen chungchangah engmah hlauhthawn tur a awm loh thu a sawi.

Robert Romawia chuan, "Assembly procedure en hnua ngaihdam dil ngai a awm avangin ngaihdam a dil a, inngeih takin kan inchibai a, thlate kan laho. A hnuah beihna chi hrang hranga min bei lehin, office of profit chungchangah min bei leh a, vawi khat ngaihdam dil hian nghawng a ngah mang e aw, ka ti," a ti.

Robert Romawia Royte chuan, "Document leh prove-na engkim nei ka ni a, keima mimal thil a ni a, ka hriat loh lam thil a ni a, ka hriat loh lam dan a nih loh chuan engmah hlauhthawn tur a awm lo," a ti a; ZPM-in an hniam phah zawk a hlauhpui thu a sawi.

Tun hmain PRISM-in an hêk tawh thu sawiin RRRa chuan, "Kohhran thawhlawm thawh thlengin min bei. Mahse, malsawmna ka dawn a nih avangin Pathian thu leh police lam thu ka awih avangin thu dik chu a rawn lang mai a ni," a ti.

MNF Adviser chuan, MNF-a a kúl a táia awm tawh, sum leh therhlo vanga MNF chhuahsantute zingah mi hlawhtling sang chhuan tur an awm lo nia sawiin, "MNF chhuahsan hi zuih ralna a ni. Kan hotute sawichhiaa ziak meuha chhuahtute hi an lainatawm em em a ni," a ti a; MNF chu a sàn poh leh a chhémtu thli a na zel dawn niin a sawi.

Robert Romawia chuan, Congress party-in 'Ṭhat loh theih lohna báwm' an sawi ṭhin chu tunah chuan a reh tawh niin a sawi a; ZPM chungchangah, "Ṭiau chunga ui bawk an sawi ang deuhin, an tâl nat deuh apiangin an hniam sawt sawt zel a ni," a ti.

Kum 2022 leh 2023 chu Mizorama sum hman tam ber kum, hmasawnna hna thawh nasat ber kum a nia sawiin MNF Adviser chuan, "Development-ah hma kan sawn nasa em em a, Pu Zoramthanga sorkar hi sorkar hmasawn duh leh hmasawnna thawk nasa ber sorkar a ni," a tia a; SASCI aṭangin cheng nuai 50,000-in sorkar kumtharah hma an lak dawn thu a sawi bawk.