Thluaka sum lut an sawi fo hi CM leh Robert Romawia an nih hmel - C Ngunlianchunga, MLA

Lawngtlai West bialtu MLA C Ngunlianchunga chuan nimin khan Aizawl Press Club-ah thuthar thehdarhtute a kâwm a; thluaka sum lut an sawi fo chu chief minister Zoramthanga leh minister of state Robert Romawia Royte an nih mai hmela a hriat thu a sawi.

C Ngunlianchunga chuan, June 6, 2022 khan District Council & Minority Affairs (DCMA) leh North East Consultancy Services (NECS) ten thuthlung (deed of agreement) an ziah thu sawiin, "NECS neitu hi Vanlalfelpuia Royte s/o Robert Romawia Royte a ni. NECS neitu hi DCMA minister thar pu Robert Romawia fapa nia hriat a ni," a ti.

DCMA leh NECS-in deed of agreement an ziak chu sorkar kalphungah leh Representation of People's Act, 1951 Section 9(A) kalh a nih thu sawiin Ngunlianchunga chuan, "Chuvangin, sorkar hian he deed of agreement hi a cancel tur a ni," a ti a; agreement a sût lo a nih chuan DCMA department chu Robert Romawia enkawltir chi a nih loh thu a sawi.

C Ngunlianchunga chuan, an fate ngei firm leh DCMA-te'n deed of agreement an ziah tawh hnua Chief Minister-in Robert Romawia hnena DCMA department a pe chu mak a tih thu sawiin, "Thluaka sum lut an sawi fo hi an pahnih hian an va nih mai hmel ve ka ti a ni. Hnung thak inhiah tawnna a awm ngei niin a lang a, ADC area mipui hi MNF sorkar hian engah mah a ngaih lohzia a tichiang hle," a ti.

Lawngtlai West Bialtu MLA sawi danin, tuna MNF kaihhruai sorkar kal laiah DCMA department kaltlangin infiamna ruhrel (sport infrastructure)-ah Lawngtlai district bik tan PMJVK scheme aṭangin cheng nuai 11,376.39 a chhuak a ni.

Lawngtlai district bik tana sum tam tak hman a ni chu a lawmawm rualin, ADC area-a awm mipui thawh ve theih tur àwm hnaah pawh 99% chu an duhsak bik firm pek an nih vek thu leh lungchhiatthlak a tih thu te, PMJVK hnuaia Lawngtlai district-a hna chi hrang hrang 38 thawh zingah ADC huam chhunga miin a thawh pakhat chiah a awm thute C Ngunlianchunga chuan a sawi bawk.