Kalphung thar, mipui sorkar din ngei kan tum - ZPM President

ZPM president Lalliansawta chuan, ZPM party chuan kalphung thar, mipui sorkar din ngei an tum thu leh a ṭha lo leh dik lo hnâwl a, rinawmna, dikna leh huaisenna nena ram tana pên turin an inbuatsaih mek thu a sawi.

Nimina ZPM pisaa inkhawmah thu sawiin Lalliansawta chuan, Mizoram leilung chu engkim ṭhat duh em emna a ni chungin tun thlengin intodelhna sawi tur a la awm loh thu a sawi a, "Party sorkar, mi tlemte hamṭhatna sorkar kan lo din tawh ṭhin avangin ZPM chuan kalphung thar mipui sorkar din ngei kan tum a ni," a ti.

Lalliansawta chuan, "A ṭha lo leh dik lo hnâwl a, rinawmna, dikna leh huaisenna nena ram tana ke pên turin ZPM kan inbuatsaih mek. Mahni hlutna pawh hralh duh khawpa rilru piangsual kan ramah kan awm fo hi a zahthlak hle a ni," a ti a; thawhrimna nena rorelna chelh tumin hma an lâk mek thu a sawi.

Mizoram dinhmun ngun taka enin lung a awi thei lo tih sawiin Lalliansawta chuan, "Kum naupang tê têa thihna tam lutukte hian rilru a tina tak zet a, nang leh kei hi a siamṭha theitu kan ni. Mi awkhrawl leh mi dik lote'n rorelna fawng an vawn zel lohna turin hma kan la zel dawn a ni," a ti.

ZPM President chuan, March 29-a Lung­lei Municipal Coun­cil inthlan tur leh kumin tawp lama MLA inthlan­pui awm turah chhia leh ṭha hriatna thiang tak hmang turin mipui a ngen a, "Lunglei mipuite LMC inthlan awm turah ngun taka ngaihtuahna hmanga vote thlak turin ka sawm a che u," tiin a chah.

Nimina ZPM pisaa inkhawmah hian an party zawm tharte lawm luh an ni a, chung zingah chuan zaithiam lâr Vanlalsailova pawh a tel a ni.