KHAWTHLIR
Police-in leitha man
Bairabi Zophaia police checkgate duty-te chuan March 19, Pathianni khan truck pakhat aṭangin phalna nei loa phurh leiṭha (urea) ip 500 an man a; leiṭha neiktu Bahar Uddin Laskar, Katlichera, Hailakandi district nia inchhál manin, Bairabi Police Station-ah Essential Commodities Act tlawhchhanin thubuai ziah luh a ni.
MADC session
Mara Autonomous District Council (MADC) budget session, ni li chhung awh tur chu nimin khan ṭan a ni. Chief executive member M Laikaw chuan kum 2023-24 MADC budget tura ruahman cheng nuai 17,468.99 a pharh a, March 23, 2023 khian sawihoa pawm tum a ni ang.
Gutkha do rêl
MHIP Sub-Headquarters, Khawzawl chuan nimin khan Tualpui centenary hall-ah rorel inkhawm an hmang. An rorel zingah - mahni branch huam chhung ṭheuhah theihtawpa gutkha product do te, pasal nei turin puan 15 aia tam chhawm loh te, Mizoram Customary Law-in man ei tur dik tak a tihte chauh manṭang eitirte a tel.
Seat belt alarm kaihhnawih thupek
Aizawl bawrhsap Dr Lalhriatzuali Ralte chuan thupek chhuahin, lirtheia chuangte himna tura siam seat belt-te ṭha taka hman a nih theih nan seat belt alarm hmeh mih theihna hmanrua zawrh, lei leh hman khap a nih thu a puang a, "Motor part zuartute'n dan kalhin seat belt stopper clip an zuar ṭhin tih hriat a ni a, mihring himna tiderthâwng thei a nih avangin zawrh khap tlat a ni," a ti.
Minister leh officer
Minister K Lalrinliana chuan nimin khan Kolasib DC circuit hall-ah Kolasib district-a sorkar hotute a kâwm a, hmasawnna atana hmachhawp leh hnathawk mekte a sawipui. Huan, lo, ram neitute'n chak zawka hma an lak theih nan kawlphetha thlun zawm dan tur leh Koalsib district-ah buhfai tam zawk thar a nih theih nana hmalak dan turte sawiho a ni.
Minister-in Poshan Pakhwada hawng
Social Welfare & Tribal Affairs minister Lalrinawma chuan nimin khan Secretariat conference hall-ah chaw ṭha leh hrisel hmuh theihna tura hmalakna Poshan Pakhwada 2023 a hawng a; Pakhwada (fortnight) hman chhungin thil chi hrang hrang hman tura duan a ni.
Poshan Pakhwada (Nutrition Fortnight) hi sorkar laipui ruahmanna angin March 20 aṭanga April 3, 2023 thleng hman tur a ni a; thupui pathum - Promotion and Popularization of Shree Anna/Millets for nutritional well being, Celebration of Swasth Balak Spradha (Healthy child) leh Popularizing Shaksham Anganwadis tihte a awm.
Police leh AR-in kuhva rah man
Sairang police-te chuan March 19, Pathianni khan truck pakhat aṭangin Myanmar aṭanga dan loa lak luh nia hriat kuhva rah ro ip 130 (kg. 12,800) leh lirthei khalhtu Lalrintluanga (36) s/o Thangchhuanga, Kolasib nia inchhál an man. Kuhva rah hi Champhai aṭanga phurh, Kanhmun, Mamit district panpui lai a ni.
Assam Rifles pawhin March 18, 2023 khan Hnahlan, Champhai district-ah Myanmar aṭanga dan loa lak luh kuhva rah ip 180 an man a, Rs 1,00,80,000 hû a tling. Kuhva rah leh lirthei khalhtu Lalfamkima (28) s/o Lalthlamuana, Durtlang Leitan nia inchhál chu Champhaia Customs Preventive Force hnenah an hlan a ni.
Officer transfer order sût phût
Mamit District Ṭhalai Pawl chuan, Mamita UDPA department officer C Sawihlira leh Land Revenue & Settlement officer Lalsanglura te chu thlâktu awm loa sorkarin a sawn chhuak chu an hriatthiam loh thu an tarlang a; an aiawh dah nghal a nih dawn loh chuan transfer order sût turin sorkar an phût.
Mamit district chu chhawmdâwl ngai bik, Aspiration District a ni tih tarlangin Mamit District Ṭhalai Pawl chuan, "Mamit district hmasawnna tura mi ṭhahnemngai tak takte sorkain thlâktu awm loa min sawnsak ṭhin hi a pawi kan ti. Kan officer-te pahnih hi an aiawh/thlaktu tur sorkarin an dah dawn lo a nih chuan an transfered order cancel turin Mizoram sorkar kan ngen a ni," an ti. An ngenna sorkarin a ngaih pawimawh loh chuan ṭul leh ṭha an tih angin hma an lak dawn thu an tarlang bawk.