Kum tin cheng nuai 40,000 vel sêngin state páwn aṭangin kawlphetha lei a ni

Governor Dr Hari Babu Kambhampati chuan nimin khan Raj Bhavan-ah Power & Electricity department hotute a kâwm. Mizoramin state páwna hmun panga aṭangin kum tin cheng nuai 40,000 vel sêngin kawlphetha a lei ṭhin thu tarlan a ni.

Power & Electricity (PE) department hotute chuan, Mizoramah kawlphetha megawatt 798 siam chhuahna turin hydro electric power (HEP) project DPR siam zawh tawh panga a awm thu an sawi a; project dang pali - Tuipui HEP, Tuichang HEP, Mat Sekawi HEP leh Tlawng HEP pawh kalpui theih a nih leh nih loh enfiah mek a nih thu an sawi bawk.

Tun dinhmunah Mizoramin kawlphetha a mamawh zat aṭanga eng emaw zat chu state pawn aṭangin lei a ni a; power plant panga - AGBPP (NEEPCO), AGTCCP (NEEPCO), Baramura-IV (TPGL), Baramura-V (TPGL) leh Palatana plant aṭangin kum tin cheng nuai 40,000 vel séngin kawlphetha lei ṭhin a nih thu PE department hotute chuan an sawi.

Governor chuan, tun hnaiah Mizorama lui luang khuah theih hmanga kawlphetha siam chhuah chungchang Prime Minister a sawipui thu te, PM chuan ṭha taka a lo ngaihthlak thu te, state level-ah enfiah hmasak a nih hnuah a ṭul dan azira hmalak ṭha a tih thute a sawi a; Mizoramah kawlphetha siam theihna tam tak awm mek chu hman ṭangkai thuai ni se ṭha a tih thu sawiin, PE hotute chu thil awmzia a zawt a ni.

DPR siam sa awm mekte chu ṭha thawkhata a ngaih thu sawiin Larsap chuan, Ministry of Power hotute sawipui hmasa turin a chah a; chumi hnuaah DPR neih sate chu Prime Minister Office-ah PE department hotute'n presentation ṭha tak siamin thehlut se ṭha a tih thu a sawi.

Inkawmnaah hian PE secretary H Lalengmawia, joint secretary Lalduhawma, SE (Planning) JH Malsawma leh EE (Civil) Daniela te an tel a; nizung chakna hmanga kawlphetha siam belh theih dante pawh an sawiho bawk.