BJP kan sorkar chuan sorkarah Krista lalna kan thlentir dawn - BJP President

BJP, Mizoram Pradesh president Vanlalhmuaka chuan, MNF leh Congress-ah beisei a bo tawh thu leh ZPM-ah pawh beiseina tak tak neih theih a nih loh thu sawiin, BJP an sorkar chuan sorkarah Krista lalna an thlentir dawn thu a sawi.

Vanlalhmuaka hian nimin khan an party pisaah thu sawiin, "Mizoram ṭhalai tam tak chuan thil tak tak an duh avangin BJP sorkar a ṭul tawh hle tih hi an hria a, mipuite'n beiseina sang tak an nei tih a hriat theih. MNF leh Congress-ah beisei a bo tawh a, ZPM hian nasa takin hma an la chungin, Central an zawm lohna hi beiseina tak tak an neih theih lohna pakhat a ni," a ti.

Central BJP hruaitute'n mahni hnam leh sakhuaah rinawm tura an chah nasat thu sawiin Vanlalhmuaka chuan, "BJP kan sorkar chuan sorkarah Krista lalna kan thlentir ang," a ti a; chuta ṭang chuan ring lo mite'n Krista an hmu thei dawn niin a sawi.

Mizoram BJP President chuan, hmarchhak state dangah BJP sorkarin term khat chhungin hmasawnna nasa tak an thlen nia sawiin, "Mizoramah pawh BJP sorkar nei ve ila chuan ṭhenawm state-te aia nasa zawk pawhin development hi kawng hrang hrangin a thleng thei a, Central hian chutiang ti turin min pui thei reng a ni," a ti.