Fisheries Minister-in chakai farm a tlawh

Fisheries minister K Lalrinliana chuan nimin khan Kolasib Dumluia SEDP hnuaia din Chakai Demonstration Farm a tlawh. Minister chuan, chakai note chu hlawhtling taka enkawl a nih chuan Chakai Demonstration Farm hnuaia hmalakna chu hlawhtling thawkhatah ngaih theih a nih thu a sawi.

K Lalrinliana chuan, thianghlim leh hnianghnâr zawka chakai neih a nih theih nan SEDP pilot project hnuaiah Chakai Demonstration Farm kalpui a nih thu a sawi a, "He enchhinna hi a hlawhtlin chuan lui dunga nungchate humhalh nan hmanraw ṭangkai tak a nih dawn a, chakai farm siam chu eizawnna tlakin hman theih dawn a ni," a ti.

Nimina Chakai Farm tlawhnaah hian chakai awm zingah a no pâi hmuh a ni a; Minister chuan, "Chakai notête hi hlawhtling taka enkawl an nih chuan Chakai Demonstration Farm hnuaia hmalakna hi hlawhtling thawkhatah a ngaih theih," a ti a, chakai farm enchhinna chu a hlawhtlin theih nan Fisheries department leh a hmuna enkawltute theihtawp chhuah turin a chah.

Kolasib district fisheries development officer (DFDO) tarlan danin, Chakai Demonstration Farm-in a tum ber chu cement-a siam khur/zém (cemented pond/tank)-ah chakai vulh theih dan te, an inthlahpun dan te, an ṭhan dan te, dam leh hrisel taka vulh an nih theihna tura mamawhte zirchianna atan a ni.

Chakai farm-ah hian June-August 2021 leh March 2022 khan hmun hrang hrang aṭanga chakai lak khawmte dah a ni a, Fisheries department leh ICAR-a mithiamte'n a huhoin an endik tawh niin sorkar thuchhuah chuan a tarlang. Minister hi Fisheries secretary Laldawngliana, director F Vanlallawma leh hotu dangte'n an ṭawiawm a ni.

Fisheries minister K Lalrinliana hian Assembly session neih zawh takah February 26, 2023 khan zawhna chhángin, Dumluia chakai farm siam leh enkawlna atan cheng nuai 39 sèn a nih tawh thu leh farm chu sum lak luhna atana tih a nih loh thu a tarlang a, "Pilot project tura siam a ni a, April 2020-a bul ṭan niin, hmalak chhunzawm zel a ni a, departmental work-a thawh a ni," a ti.