CM Zorama leh Amit Shah an inkâwm; AR hmun thar April 1-ah hawn tum a ni

Chief minister Zoram­thanga chuan nimin khan Union Home minister Amit Shah chu New Delhi-a a pisaah a hmu a; Amit Shah chuan, April 1, 2023-ah Zokhawsanga Assam Rifles battalion head-quarters complex hawn a tum thu a lo hrilh.

Union Home Minister nena an inkawm chungchang hi CM Zoramthanga chuan Instagram-ah a tarlang a, "April 1, 2023 hian Assam Rifles battalion headquarters complex, Zokhawsang chu rawn hawn ngei a tum thu leh Laldenga Cultural Centre din tur lungphùm rawn phùm a tum thu min hrilh a ni," a ti.

Chief Minister chuan, "Mizo mipuite beisei leh nghahhlelh em em, kan sorkar hmachhawp lian tak ni bawkin a tak ram a thleng tur hi lawm­awm ka ti a, Pu Amit Shah chungah pawh Zoram mipuite aiawhin lawmthu ka hrilh a ni," a ti bawk.

CM Zoramthanga hian March 20, Thawhṭanni zan khan DoNER leh Culture & Tourism enkawltu minister G Kishan Reddy chu a chenna inah a kawm bawk a, Mizoram tana hmachhawp hrang hrang leh hmasawnna hnathawh mek dinhmunte an sawi dûn niin sorkar thuchhuahin a tarlang.