Tlawng lui NW no. 102-ah puang

Ports, Shipping and Waterways minister Sar­bananda Sonowal chuan, Assam-a Ghar­mura lei NH-154 aṭanga Khàmráng rama NH-54 bul thlengin Tlawng lui km. 87.136-a thui chu National Water­way no. 102 atan puan a nih tawh thu a sawi.

Parliament session neih mekah Sarbananda Sonowal chuan nimin khan Mizoram Rajya Sabha MP K Vanlalvena zawhna chhángin, Assam state chhunga Ghar­mura lei NH-154 aṭanga Mizorama Tlawng lui, Khamrang rama NH-54 bul thlengin National Waterway no. 102 atan puan a nih tawh thu a tarlang a; chutih laiin, Tlawng lui Khamrang leh Sairang inkar erawh chu tui a thûk tâwk loh avangin NW-102-in a huam loh thu a tarlang a ni.

Sarbananda Sonowal chuan, Khawthlangtuipui luia Tlabung leh Tui­chawng inkar tihhmasawn nan leh lui mawng tihfai nan cheng vbc. 6.17 pawm a nih tawh thu leh, sum ruahman aṭangin first instalment cheng vbc. 1.23 pek chhuah a nih tawh thu a tarlang.

MP K Vanlalvena hian Bay of Bengal kama Sittwe lawng chawlhhmun aṭanga Myanmar leh Mizoram inrìna thlengin Chhimtuipui lui chu lawng zawh theiha siam tumna a awm leh awm loh a zâwt a; Union minister Sonowal chuan, Mizoram aṭanga km. 121-a thui Paletwa thleng Kaladan Multi Modal Transit Transport Project kawngpui siam mek a nih thu a tarlang a; Chhimtuipui lui kal zelah Paletwa aṭanga Sittwe thleng, km. 158-a thui chu lawngin a zawh theih thu a tarlang bawk.