Governor-in ZMC hmanraw mamawhah ruahmanna siam turin thuneitute a chah
Governor Dr Hari Babu Kambhampati chuan nimin khan Zoram Medical College (ZMC) a tlawh a, Health secretary Esther Lalruatkimi, ZMC director John Zohmingthanga, registrar Dr Jane R Ralte leh thawktu dangte'n an lo dawngsawng a, hmanraw mamawhah ruahmanna siam turin ZMC hotute a chah.
ZMC-in hmachhawp a neih zinga National Medical Commission (NMC) aṭanga recognition (pawmpuina) hmu tura pawimawh zualte Health Secretary-in a sawifiah a; Mizoram sorkarin Health Minister hoa ruahmanna an thehluh tawh leh bawhzui ngaiah a remchan dana hma lakpui turin Governor a ngen.
ZMC director Dr John Zohmingthanga pawhin ZMC chungchang, hmalakna kal mek leh hmachhawpte a lem nen a sawifiah bawk.
Governor chuan, Mizoram tana ZMC pawimawhna a hriatthiam thu sawiin, "Mizoram sorkarin NMC pawmpuina hmu tura theihtawpa ZMC a tiphuisui zel hi a lawmawm," a ti a; ZMC-in NMC pawmpuina hmu tura hmasawnna ruhrel siamna tur project proposal a siamte chu a theih anga nawrpui a tum thu a sawi.
Hmasawnna ruhrel siam tura ruahmante chu a hautak avangin public sector undertaking liante be kual a, corporate social responsibility sumte ngaihven ṭha a tih thu sawiin Larsap chuan, "Ka ngaih pawimawh em em pakhat chu ZMC department hrang hrangte hmanraw changkang zawk nena thuam a ni," a ti.
Dr Hari Babu Kambhampati chuan Health Secretary leh ZMC Director-te chu ZMC department tina head of department-te nen inráwn khawm a, hmanraw mamawhte tichianga ruahmanna ṭha tak siam turin thuràwn a pe a; sorkar laipui ministry-ah thehluh a nih hunah theihtawp chhuaha nawrpui a inhuam thu a sawi.
Aizawl páwn lamah doctor indaih lohna a taka a hmuh thu sawiin Governor chuan, "Mizoram hmun hrang hrangah doctor indaih lohna a nasa a, a bikin hmeichhe lam doctor (gynaecologist) leh naupang enkawltu doctor (pediatrician) indaih lohna a zual," a ti a; thingtlanga doctor indaih lohna chu ZMC aṭanga MBBS zir zo an awm hunah a ziaawm a beisei thu a sawi bawk.
ZMC-ah hian kum tin MBBS seat 100 a awm a, seat 70% chu Mizoram quota a ni a, 15% chu all India quota niin, 15% dang chu NRI (non resident Indian) quota a ni.
Tunah hian ZMC-ah MBBS zirlai 488 awmin, hmeichhia 270 leh mipa 218 an ni a; zirtirtu 144 leh non-teaching staff 554 an awm bawk. MBBS batch hmasa berte chuan internship leh house an zawh hnuah kum 2024-ah degree neiin an zo dawn a ni.