Congress candidate thlang turin ngen

Mizoram Pradesh Congress Committee (MPCC) hruaitute chuan nimin khan Lunglei Press Club-ah thuthar theh­darhtute an kâwm a; Lunglei Municipal Coun­cil (LMC) inthlanah Lunglei­in harsatna a tawh laia MLA ngáwi rengte ang thoa CM Zoramthanga hnena thil sawi ngam lo tur councillor thlang lo tur leh Congress candidate-te thlang tling turin mipui an ngen.

MPCC hruaitute chuan Congress party-in Mizoramah sorkarna a siam tawh ṭhin tih sawiin, "Duhthusam ni lo mah se, Mizoram hmasawnna lian tham tam zawk hi Congress sorkar ruahman leh a tihhlawhtlin a ni deuh vek," an ti.

Lunglei khawpuiin chhantu leh duat taka enkawltu a mamawh tih sawiin MPCC hruaitute chuan, "MNF sorkar hian Lunglei mipuite hi hma­ngaihna leh duhsakna tak tak a nei ngai lo. Lunglei Municipal Council hi Lunglei mipui tam takin an duh lo chungin ‘Kan sorkar laia kan din’ an tih theih nan Lunglei mipui barh luih an lo ni dawn ta a ni," an ti a, chuvang chuan inthlan hmachhawn a ngaih tâk thu an sawi.

Congress party hruaitute chuan, ZPM mite chu mi dang ṭhatna lai hmu duh lo-ah puhin, "An chhiatna lai zawng ngar ngartute an nih avangin ZNP an nih lai aṭang tawhin mipuite'n an kutah rolrelna an pe duh lo," an ti a; LMC inthlan tura Congress party candidate-te vote turin mipui an ngen a ni.

MPCC hruaitute chuan Congress party-in sorkarna an chan laia Lunglei khawpui tana an hnathawhte an tarlang a, chu'ng zinga ṭhenkhat chu a hnuaia mite hi a ni.

1. High Powered Committee, Lunglei din leh a taka hna thawhtir.
2. Lunglei by-pass road siam nan NEDP aṭanga cheng nuai 900 dah.
3. Mizoram Engineering College din leh a hmunhma siam.
4. SYS Football Academy din.
5. Lunglei Convention Centre, cheng nuai 1,877.40 sénga sak.
6. Ṭhuamluaia Mualah cheng nuai 397.52 sênga phùl lem phah.
7. Lena Stadium, cheng nuai 2,418 sênga siam.
8. Lunglei Water Supply Scheme siam leh hawn.
9. MZU Southern Campus din tura hmalak.
10. Aizawl-Thenzawl-Lunglei World Bank Road siam bul ṭan leh tihpuitlin.
11. Education Complex & Guest House, cheng nuai 1,040 sénga sak.
12. Kawmzawla Laldenga Park, cheng nuai 185.90 sênga siam.