KHAWTHLIR

MLA-in hlân

Aizawl West-III bialtu MLA VL Zaithanzama chuan March 20, Thawhṭanni khan a bial chhunga Khatla South, Nursery Veng, Maubawk leh Mission Vengthlang khawtlang hruaitute hnenah infiamna hmun leh vantlang hmuna dah turin tui tihvawhna leh tihthianghlimna (water cooler) pali a hlân.

Phone leh meizûk

State Election Commission chuan, Lunglei Municipal Council inthlan awm turah vote thlakna hmun leh vote chhiarna hmunah mobile phone ken luh leh meizûk khap a nih thu a puang. Municipal returning officer (MRO), assistant MRO, observer, counting official leh venghimna hna thawktute erawh chuan silent mode-a dahin an ken luh phal a ni thung.

ID card ken tur

State Election Commission chuan, March 29, 2023-a Lunglei Municipal Council inthlan turah vote thlak turte'n mahni nihna tichiang thei ken tur a nih thu a tarlang. Mahni nihna tichiangtu atan EPIC, Aadhaar card, passport, driving license, PAN card, service identity card, student identity card leh document rintlak dangte hman theih a ni.

PYD Day

Nimin March 21 kha United Pentecostal Church – North East India hnuaia ṭhalai pawl, Pentecostal Youth Department (PYD) din cham vawi 54-na a ni a, bial leh tualchhung kohhran hrang hrangte'n an remchan danin an lawm. March 21, 1969 khan NEI Unit Executive board hmasa ber chuan UPC (NEI) PYD hi a din a, general PYD president hmasa ber chu Rev. KL Hnuna a ni. UPC (NEI) hnuaia tualchhung kohhran 574-ah PYD hi din tawh niin, member 25,849 an awm mek a ni.

EFCC zirhona

Wildlife Institute of India leh Mizoram Environment, Forests & Climate Change department chuan nimin khan Chief Wildlife Warden conference hall-ah ni hnih awh 'Workshop on Illegal Wildlife Trade, Wildlife Forensic leh Handling of Confiscated Wildlife' khârna hun an hmang. Zirhonaah hian EFCC officer mi 30 chuang an tel a ni.

Heroin man

Assam Rifles sipaite leh Mizoram Police-a Special Narcotics Police Station mite chuan nimin khan Sateek khuaah heroin gram 120 an man a, a neitu nia ngaih mi pahnih - Lalngurliani (50) w/o Hauṭhuama, Chhiahtlang leh Dimkhanching (48) w/o Khamkhanlian, Tahan E group, Myanmar an man tel nghal. Heroin an man hi Rs 60,00,000 hù a ni.

Police-in ganja man

Mizoram Police-a Special Narcotics Police Station team chuan March 20, Thawhṭanni tlai khan Chite Veng, Aizawlah Lalbiaknunga (21) s/o Zakhu, Bungtlang South, Lawngtlai district, Nursery Veng, Aizawla khawsa mek nia insawi hnen aṭangin ganja (cannabis) kg. 2.4 an man.

E Roll tlangzarh

Aizawl district election officer Dr Lalhriatzuali Ralte, bawrhsap chuan nimin khan Zemabawk, Durtlang Leitan leh ITI Veng local council by-election-a hman tur final electoral roll a tlangzarh. Tlangzarhnaah hian political party leh pawl hrang hrang aiawhte an tel. Electoral roll-a a lan danin, Durtlang Leitan polling station (PS) pathumah voter 2,989, Zemabawk PS pariatah voter 7,032 leh, ITI Veng PS pangaah voter 4,595 an awm a ni.

Vote chhiar turte training neihpui

Lunglei Municipal Council inthlana vote chhiar tur counting supervisor mi 60, counting assistant mi 30 leh additional counting assistant mi 30-te tan nimin khan Lunglei Convention Centre-ah training buatsaih a ni a, municipal election officer Ramdinliani'n a hmanpui. LMC inthlana vote tlate chu April 3, 2023-ah Saikuti Hall-ah chhiar a ni ang.

Hostel hawng

Assembly deputy speaker H Biakzaua chuan nimin khan Lawngtlai AOC Venga Lairam Higher Academy of Science hostel sak thar a hawng. Hostel hi Rs 52,04,160 hmanga sak a ni a, contractor chu Lalzahawma Chinzah, Lawngtlai a ni.

Mi 25 man

Lawngtlai District Coordination Committee on Tobacco Control chu nimin khan DC conference hall-ah an ṭhukhawm a, hmalakna leh hmachhawpte an sawiho. April 2022 aṭanga March 2023 chhungin Anti Tobacco Squad-in squad drive vawi 78 an nei a, dan bawhchhia mi 25 an man thu leh, Lawngtlai District Hospital-a tobacco cessation clinic-ah vaihlo nghei tum inziak lut mi 353 an awm thu tarlan a ni.