Chhamb Battle Honour Day-a tel tur sipai bángte'n Aizawl an chhuahsan

Kum 1971-a Chhamb indonaa tel Mizo sipai intélkhawm, Ex-Fighting Fifth Association member-te chu March 23-25, 2023 chhunga Kalimpong, West Bengal-a Chhamb Battle Honour Day vawi 50-na leh 5th Assam Regiment kum 60 tlin lawmna hmang turin nimin khan Aizawl aṭangin an chhuak a, MJA president C Lalrambuatsaiha'n a vailiam.

Chhamb Battle Honour Day lawmnaa tel turte vailiamna inkhawm hi Vanapa Hall kawtah neih a ni a; C Lalrambuatsaiha chuan, India sipaiah Mizo tam tak an lut tawh tih sawiin, "Mizo sipaite an chhuanawm em em ṭhin a, indona hmunah rál hmatáwngahte awmin, huaisen takin ram tan an lo bei tawh ṭhin a, Mizote min tihmingṭhatute an ni," a ti.

Ex-Fighting Fifth Association (EFFA) hruaitute sawi danin, EFFA member-te hi East Pakistan (tuna Bangladesh)-in zalenna a sual laia December 3-17, 1971 chhunga Chhamb Sector, Jammu & Kashmir-a India leh Pakistan indonaa telte an ni a; India-in Pakistan a hneh avangin 5th Assam Regiment-te chu India sorkarin battle honour a pe a ni.

East Pakistan-in kum 1971-a zalenna a sualnaah East Pakistan lama indonaah India-in Pakistan a do a, chu chuan J&K lama Chhamb Sector lam pawh kâng kaiin, December 3, 1971 khan Chhamb Sector-ah India leh Pakistan an indo ṭan a ni. Chhamb indonaah hian 5th Assam Regiment sipaite pawhin nasa takin Pakistan an do a, an zingah Mizo sipai 180 chuang an tel. Mizo sipai zingah hliam eng emaw zat awm mah se, thi an awm lo niin an sawi.