Champhaiah ráltlân chungchang zirho

Champhai District Committee on Myanmar Refugees leh Adventist Development and Relief Agency, India hotute chuan nimin khan DC conference hall-ah Myanmar ráltlânte chhawmdawl dan tur, 'Protection and humanitarian assistance to new arrivals from Myanmar in Mizoram 2023' chungchang an sawiho.

Ṭhutkhawma tarlan danin, March 20, 2023 thleng khan Champhai district-a khaw 47-ah Myanmar ráltlân 10,226 an awm tawh a, chu'ng zingah chuan puitling mipa 3,033 leh hmeichhia 3,264 awmin, 3,929 chu naupang an ni.

Ráltlânte awmna tura sak relief camp 34 a awm a, chu'ng zinga 13 chu kum 2021-a siam niin, kum 2022 khan 21 sak belh a ni. Ráltlân zinga mi 2,643 chu relief camp-ah an khawsa a, mi 7,583 chu hmun dangah an awm thung.

Champhai district-a ráltlân mi 10,226-te chhinchhiah hna zawh tawh a ni a, mi 9,488 chu temporary identity card pek tawh niin, mi 738 tan buaipui mek a ni. Ráltlânte pualin dan leh hrai inzirtirna (legal awareness camp) ṭum 12 buatsaih a ni tawh bawk.