MZP-in Lokayukta-ah Enquiry Wing din vat turin Mizoram sorkar an ngen

MZP chuan thuchhuah siamin, eirûkna dona tura din Mizoram Lokayukta chuan beisei a phâk loh nasat thu leh thubuai chhuitu tur Enquiry Wing an neih loh avangin harsatna lian tak an tawh mek thu an tarlang a, Enquiry Wing din vat turin Mizoram sorkar an ngen.

MZP hruaitute chuan an vice president Andrew F Lalramnghaka hoin nimin khan Mizoram Lokayukta chairman C Lalsawta chu a pisaah an kâwm a, Mizoram Lokayukta dinhmun leh harsatna an tawhte an sawipui a ni.

Mizoram Lokayukta chungchangah hian MZP chuan thuchhuah siamin, "Eirûkna dona tura din Mizoram Lokayukta hian tun dinhmunah beisei a phâk lo nasa hle a, danin a sawi angin an case dawnte chhuitu tur Enquiry Wing an neih loh avangin harsatna lian tak an tâwk mek. Loh theih lohna avangin Mizoram sorkar agency ACB an hman avangin duh angin an hnuchhuinaah an chak lo niin kan hria," an ti a; a rang thei ang bera Enquiry Wing din turin sorkar an ngen.

MZP chuan, Lokayukta-ah thawktu mi 93 awm tura tih a nih laiin mi 42 an awm mek tih sawiin, "Thawktu indaih lohna hi mi 49 lai a ni a, tuna thawktu tam ber pawh department danga mi deputation-a pawh chawp leh contract basis deuh vek an ni. Tuna Lokayukta awm danah hian eirûkna do tak tak tura beisei chi niin a lang lo a, ngaihsak an ṭul tak zet a ni," an ti.