Pension kum 60 aia sang vek hmanna state sorkar a awm lo

India ram state sorkar hrang hrangah retirement age kum 60 aia sáng vek hmang state an la awm lo a, kum 60 aia sang awmnaah pawh sorkar hnathawk zawng zawng tan a ni lo. West Bengal-ah kum 62-65 an hmang tawh nia tarlan a awm laiin, Kolkata-a Mizoram sorkar hnathawkte chuan kum 60 a nih thu an sawi.

State sorkar hrang hranga retirement age tarlan­na document pakhat chu Fede­ra­tion of Mizoram Govern­ment Employees and Workers (FMGEW)-in sorkar hnathawk páwl hrang hrangah an thehdarha sawi a ni a; chutih rualin, khawi aṭanga lâk chhuah nge hriat a ni lo. FMGEW hi Mizoram sorkar hnathawkte pension hun kum hniha tihsan a, pension kum 62 ni tura nawr mektu a ni.

Document tihdarha a lan danin, hmarchhak state bikah, Arunachal Pradesh, Nagaland leh Tripura-te state sorkara pension kum chu 60 vek a ni a, Assam-ah kum 50 leh Sikkim-ah kum 58 a ni. Hetih lai hian, Assam journalist pakhat chuan an state sorkara pension kum chu 60 a nih thu Vanglaini palai a hrilh.

Manipur-a journalist pakhat pawhin Manipur state sorkara pension kum chu 60 leh 65 a nih thu sawiin, "Department azirin a danglam a, department ṭhenkhatah kum 60 a ni a, department ṭhenkhatah kum 65 a ni," a ti.

Meghalaya government press-a thawk pakhat pawhin an state sorkara retirement age chu 58 a nih mek thu Vanglaini palai a hrilh a; Sikkim sorkar, Information officer pawhin an state sorkara pension kum chu 58 a nih thu Vanglaini a hrilh bawk.

Document tihdarha a lan danin, India rama state sorkar tam zawka sorkar hnathawkte pension kum chu 60 a ni a, hmarchhak state páwn lamah kum 60 tling lo tlem azawng - Goa, Odisha, Chandigarh, Gujarat, Haryana, Karnataka leh Uttar Pradesh-te a awm. Heng zingah hian Goa leh Odisha chu kum 58 tih a ni a, state dangte erawh chu kum 58 chauh ni loin, kum 60 tih a tel.

Hetih lai hian, West Bengal state sorkara pension kum chu 62-65 tia tarlan a ni a; chutih laiin, Kolkata-a Mizoram sorkar hnuaia thawkte chuan, kum 60 a nih thu leh doctor, damdawi-ina thawkte bik chu kum 65 a nih thu an sawi. Delhi sorkarah pawh pension kum 60 a nih thu dawn a ni bawk.

Tunah hian Mizoram sorkar hnathawkte pension kum chu 60 a ni a, doctor-te erawh chu kum 62 a ni. Mizoram sorkar ang bawkin, retirement age kum 60 aia sang kalpui tawhna state-ah pawh sorkar hnathawk zawng zawngte huam loin, thiamna leh pawimawhna bik nei sorkar hnathawkte a huam tlangpui a ni.