Sorkar ṭha lo kan hrawn mek - Lalsawta

Congress party chuan nimin khan Lunglei Municipal Council (LMC) inthlan tura inbuatsaihna atan Zotlang leh Serkawnah vantlang inkhawm an buatsaih a, MPCC president Lalsawta chuan sorkar ṭha lo kan hrawn mek niin a sawi.

MPCC President chuan sorkar ṭha lo hnuaiah mipuite retheihna a zual ṭhin nia sawiin, "Tunah hian sorkar ṭha lo kan hrawn mek a ni. Mipuite retheihna ti ziaawm turin Congress party chuan sorkar ṭha din kan tum. Sorkar ṭhaah chuan mipuite hi kan ngaipawimawh hmasa ber tur a ni," a ti.

ZPM-ah chuan mipui thlan chhuahte veng turin Val Upa Council an din tih sawiin Lalsawta chuan, "Mipuiin an thlan chhuah tawhte ven ngaiin an hre tlat a ni. Hei hi Democracy kalphung a ni lo," a ti a, ven ngai tur hruaitu hi mipuiin kan thlang ṭhin tihna a ni dawn em ni? tiin zawhna a siam.

ZPM atanga thlanchhuahte chu ven ngai vek an ni dawn tihna em ni tiin Lalsawta chuan, "Kan aiawh kan thlan chhuahteah hian mawhphurhna sang tak a awm a, chutiang tur chuan ven ngai lo mi dik, mi ṭha kan thlang mai tur a ni zawk," a ti.

Lalsawta sawi danin, hmanni lawkah Hnam Runah MNF hotupa Zoramthanga chuan, 'inthlan leh hunah chuan tun hmaa kan retheih ang kha a ni tawh dawn lo a, sum hman tur kan nei tawh dawn' tiin a sawi a, sum hmangin a party mipuite a thlamuan a ni.

Zoramthanga sum sawi chu mipui thawhkhawm sa, Kamrul-a hmanga an lo chhek kawl a nih thu sawiin Lalsawta chuan, "Chu­vangin, tun ṭumah pawh hian sum hman an rawn tum ang, tute mahin lo la duh suh u. Lei theih i ni lo tih lo lantir zawk ang che," a ti.

Lalsawta chuan Lunglei khawpui chu khawpui pawimawh tak ni mah se, rualawhna tam tak a la awm nia sawiin, "Chuvangin Lunglei khawpui tan thuneihna insemzai a pawimawh," a ti a, thuneihna semzai turin LMC-ah sorkarna an chan chuan hma an lak tur thu a sawi.