Pathian hruaina kan dawng zel ang - MNF Adviser Lalruatkima

Lunglei Municipal Council (LMC) inthlan atana campaign tura feh chhuak MNF adviser Lalruatkima, minister chuan an party-in Pathian hruaina an dawn zel tur thu a sawi.

Lalruatkima hian nimin khan Kikawn leh Bazar-ah thu sawiin, "Ramin harsatna a tawh pawhin he MNF party kaltlang hian Pathianin a lo chingfel tawh ṭhin. Hun lo la awm zel turah pawh Pathian hruaina kan dawng zel ang," a ti

MNF chuan an elec­tion manifesto an tihlawh­tling ṭha hle nia sawiin Lalruatkima chuan, "Hripui avangtein tih­hlawh­tlin loh erawh chu tlem a zawng kan nei," a ti a, Lunglei Municipal Council din pawh an election manifesto tihhlawhtlinna a nih thu a sawi.

MNF Adviser chuan ṭawngkam feikibar pui puiin an party chu miin an beih thu sawiin, "Khawvel huapa manganna kan tawh, damchhuak tura kum hnih chuang kan beih Covid hripui hial pawh engmah ni lo, sorkar tan sum senna tur awm lo ang hialah min chhuah sak a ni. A dikna erawh mipuiin an hria," a ti.

Rahsi Veng leh Sazai­kawna thusawitu MNF adviser TJ Lalnuntluanga, minister of state chuan, "Mipui hawiherah pawh ruling MNF thlantlin duhna a langin ka hria. Double Engine nen LMC hi a kal a ngai," a ti a, LMC sorkar chu state sorkar, amah siamtu nena a thawh dun a dik thu a sawi.