Leiba ngah ber state kan ni - Lalduhoma

March 21, Thawhlehni zan khan ZPM party chuan Lunglei Electric Vengah public meeting an buatsaih a, he huna thusawitu ZPM leader Lalduhoma, MLA chuan Mizoram chu India rama leiba ngah ber kan nih mek thu a sawi.

Lalduhoma chuan Mizoram budget bu chu chhiarkawp dik lo hmanga buatsaih a nih ṭhin thu sawiin, "Tunah hian India ram state zinga leiba ngah ber kan ni mek. Kumin financial year-ah hian kan dinhmun dik tak chu minus 9 a ni. Mizo­ram mipui hi economist thiam tak hlir awm­khâwm ni ila, he kan chhiarkawp dik lo avang ringawt pawh hian MNF hian MLA pakhatmah an neih ka ring tawh lo," a ti.

Lunglei khawpuia a châm chhungin sorkar leh kohhran hmun pawimawh hrang hrang a tlawh tawh tih sawiin ZPM Leader chuan, "Chak zawka hmasâwnna hnathawh tur hrang hrang ka hmu ṭeuh. Lunglei nat ruala na ve thei ram hruaitu kan neih hunah Lunglei khawpui chuan hmasâwnna hmel thar duhawm tak a hmuh ngei ka ring," a ti a, LMC inthlan chu Lunglei mipuiten bul an ṭanna tur a nih thu a sawi.

Lalduhoma chuan kan ramah politician-te an hausa chak lutuk veiawm a tih thu sawiin, "Kan MLA leh minister rualte hian an thla khat hlawh hi hmang miah loin khâwl char char pawh nisela, MLA term khat chhung hian Aizawl khawpuia in hmun ṭha tak pakhat leina man pawh a daih lo. In leh lo ropui tak tak piahlamah, thlâm ropui tak tak MLA term khat chhunga an din mai thei zel mak ka ti," a ti.