World Water Day hman a ni

Nimin kha World Water Day 2023 a ni a, thupui chu 'Accelerating Change to Solve the Water & Sanitation Crisis' tih a ni. Khawvel hmun dangte rualin Mizoram hmun hrang hrangah pawh hman a ni a, Aizawlah chuan Vanapa Hall-ah Public Health Engineering depart­­ment (PHED) leh Central YMA ṭangkawp buatsaihin hman a ni.

Vanapa Hall-a World Water Day hmanna inkhawm hmanpuitu minister Dr R Lalthangliana chuan, tuihna humhalh a nih theih nan thing leh mau, ramngawte humhim a ngai tih a sawi a, "Mizoram chu India rama state hrang hrang zingah tui harsatna tâwk mêk leh tâwk zel tur nia ngaih zingah kan tel a, chuvangin vawiin World Water Day kan hman hi kan state tan a pawimawh lehzual a ni," a ti.

Thawhhona ṭha a pawimawh tih sawiin Minister chuan, "Hripui len laia sorkar, kohhran, tlawmngai pawl leh mipui mimir kan ṭang tlang ang khan tuihna humhalh kawngah pawh kan zavaia ṭan tlan a ngai. Midangte tih tura dah lo a, mi tinten kan theihtawp kan chhuah a ṭul a, kan vei tak tak a, kan beih tak tak chuan kan hlawhtling ngei ngei ang," a ti a, hmachhawp tih tur tam tak la awmte tihlawhtling turin kalkhawmte a chah.

Central YMA president R Lalngheta pawhin thu sawiin, Mizoram hmun hrang hrangah tuihna a kâm nasa a, a humhalh kawngah ṭan lâk nasat a ngai tih a sawi a, "Tuihna humhalh chauh ni lo, faina leh thianghlimna kawngah te, ramngaw humhalh kawngahte pawh ṭan lâk nasat a ngai," a ti

He hunah hian World Water Day 2023 pual inelna hrang hrang lawmmman sem a ni a; kumin World Water Day campaign au hla ber tur chu, 'Tui leh invawn thianghlim kawnga hun khirhlai sut kian zel' tih a ni.

United Nations General Assembly chuan kum 1992 khan khawvelah tui duhkhawp leh thianghlim a awm zel theih nan tui awmsate awmze nei taka hman a ṭulzia leh chumi kawnga mi zawng zawng lungrual taka thawhho theihna turin March ni 22 hi World Water Day atan a ruat a, kum 1993 aṭangin khawvel pum huapin hman ṭhin a ni.