KHAWTHLIR

MJA khawmpui

Mizoram Journalist Association (MJA) general conference vawi 49-na chu vawiin hian Siaha-ah neih a ni dawn. Chawhma lamah khuallian Mara Autonomous District Council CEM M Laikaw hoa hun hman a ni ang a, chawhnu lamah rorel inkhawm neih a ni ang.

Thisen pe

Mizoram UPC ṭhalai Pentecostal Youth Department, Kolasib district huaihawtin nimin khan Kolasib Venglai Kohhran Sunday School Hall-ah thisen pek a ni a, mi 22 in thisen an pe. Thisen petute hi mipa leh hmei­chhia 11 ve ve an ni.

Minister-in hmanpui

Sertlangpui Group YMA chuan S Lungdai Community Hall-ah inkhawmpui vawi 31-na an hmang a, nimin khan minister C Lalrinsanga'n a hmanpui. Thupui atan 'Ram leh hnam humhalh' tih hman a ni. Minister chuan ṭhalaite chu nupui pasal neih kawngah fimkhur a, rinawmna leh taimakna vawng nung zel turin a chah. Inkhawmpui hi March 21, 2023 khan ṭan niin, vawiinah a ṭiak dawn.

Committee din

Lunglei district-a hmeichhiate an hnathawhna hmunah an zahawmna ti bawrhbang zawnga chete lakah an him theih nan Local Complaints Committee din a nih thu Lunglei district bawrhsap Ramdinliani'n a tarlang. Chairperson atan MHIP Sub-Hqrs, Lunglei president Lalliannguri, member secretary atan WCD DPO Dr Lalhruaitluangi bakah, member dang pathum ruat an ni.

Lehkhabu tlangzarh

Minister K Lalrinliana chuan nimin khan Govt. Kolasib College Main Hall-ah Kolasib College-a Mizo department buatsaih 'Awithangpa Chanchin leh a Hla thlir zauna' tih lehkhabu a tlangzarh. Minister chuan, ram leilung hausakna haichhuak phak thiamna neih tum a, hmathlir thui tak nei chunga zirna kawng zawh turin zirlaite a chah a; Kolasib College tihchangtlun lehzual nan Rs 5,00,000 ruahman sak an nih tur thu a sawi bawk.

EVM sem rualna hun buatsaih

Nimin khan Lunglei DC conference hall-ah Lunglei Municipal Council (LMC) inthlana hman tur electronic voting machine (EVM) leh vote thlaknaa duty turte sem rualna (randomization) neih a ni. Polling station 44-a hman tur EVM Control Unit leh Ballot Unit-te ruatfel niin, inthlannaa duty tur polling party team 55 pawhfel nghal a ni. LMC-ah hian vote nei mi 40,548 awmin, mipa voter 19,123 leh hmeichhe voter 21,245 an ni.