Dy. CM-in playground pahnih Siamna tur lungphum a phum

Nimin zing khan dy. chief minister Tawnluia chuan Edenthar Community Hall-ah cheng vbc. 8.18 senga siam tur Edenthar Playground lungphum a phum a, chawhnuah Tuivamitah cheng vbc. 6.97 senga siam tur Tuivamit Playground lungphum a phum leh.

Dy. Chief Minister chuan Smart City hnuaia hmalaknaah harsatna lian tak a awm tih sawiin, "Natna leh hripui vangin kum hnih chhung chu kan sukuk a ni. Kum nga chhunga thawh tur (smart city mission project) pawh kan zo hman dawn lo," a ti. Smart City Mission hnuaia hnate chu Central sorkar aṭanga viltute nen enhoa hmalak a nih avangin project pakhat khawih chhung pawh a rei thu a sawi.

Smart City hnuaiah project 30 vel kalpui mek a nih thu leh project 10 vel hmachhawp a awm mek thu sawiin Tawnluia chuan, "Aizawl West-I hi Mizoram University awmna, airport kalkawng, industrial growth centre leh rel lo luhna tur a ni. Hengte hi hmasawnna a nih rualin Aizawl khawpui ṭhan zelnaah tlak lam chu hmasawnna ruhrel dinna hmun pawimawh tak a ni," a ti.

Edenthar Playground hi metre 90x45 a zau tur a ni a, four wheeler 15 leh two wheeler 30 dah theihna tur te, mi 740 lenna tur gallery leh basement leh ground floor-ah room hrang hrang siam tel tur a ni.

Tuivamit Playground area chu metre 90x45 tur a ni a, four wheeler 17 leh two wheeler 22 dah theihna tur leh mi 1,156 lenna tur gallery siamtel a ni ang.