Kum tling loa nupui/pasal neih ven kawnga hmalakna zirho a ni

Champhai child marriage protection officer James Lalrin-chhana, bawrhsap hoin nimin khan DC conference hall-ah kum tling loa nupui-pasal neih vèn kawnga hmalakna 'Prevention of Child Marriage' chungchang zirhona neih a ni.

James Lalrinchhana chuan sorkarin kum tling loa nupui/pasal neite a ngaimawh thu sawiin, "India ram hmun dang dangahte naupang kum tling loa inneihtir an awm ṭhin hi dan phal loh a ni. Kum tling ngeia nupui/pasal neih ṭhatna leh kum tling loa nupui/pasal neih avanga harsatna thleng ṭhinte inzirtirna neih tam a pawimawh," a ti.

Women & Child Development-a district programme officer Lalrinmuana pawhin thu sawiin, "India rama hmalaknate khairual taka kalpui ṭhin a nih avangin Mizoramah child marriage chungchanga hmalakna pawh sorkar laipui duhdan anga kalpui a ni," a ti a, child marriage chungchanga awareness campaign neih tawh dante a tarlang.

Sorkar dan dinglaiin dan anga innei thei tura kum a bithliah zat chu mipa kum 21 leh hmeichhia kum 18 a nih angin dan anga inneihna kalpuina tura hmalak dan turte meeting-ah hian rêl a ni.

India ram hmun danga thleng ṭhin naupang inhualna leh inneihna awm ṭhinte Mizoramah a awm lem loh thu tarlan niin, sorkar dan dinglaiin dan anga innei thei tura kum a bithliah zat chu zawm a nih theih nan kohhran hrang hrang, NGO leh zirna-inahte ngenna siam nise, tih a ni.