Youth Festival cum Cultural Day hman a ni

Nimin chawhnu khan Nehru Yuva Kendra (NYK), Champhai leh Govt. Champhai College ṭangkawp buatsaihin college multipurpose hall-ah Yuva Utsav (Youth Festival) cum Cultural Day hman a ni a, DC James Lalrinchhana'n a hmanpui.

James Lalrinchhana chuan NYKS Champhai leh Govt. Champhai College-te ṭangkawpin Youth Festival cum Cultural Day an huaihawt leh he hun hmanpui tura sawm a ni chu lawmawm a tih thu sawiin, "NYKS kaltlanga Mizoram leh India ram hmun hrang hranga hmalaknate a chhuanawm," a ti.

India ramin zalenna a hmuh aṭanga kum 75 hnua ṭhalaite hmasawn nana hmalak tawhnate chu fakawm a tih thu sawiin Champhai DC chuan, "Youth Festival cum Cultural Day hman kaltlangin ṭhalaiteah hmasawnna tam tak tuh a nih ngei ka beisei," a ti a, hmasawnna leh hun inherdanglam zelin hnam ziarang leh hnam nunphungte a lak bo loh nan leh hnam ziarangte humhalh zel a nih theih nana ṭanrual a ṭul thu a sawi.

Bawrhsap chuan ṭhalai kalkhawmte chu khawvel inthlak danglam zel dante thlir chunga rualelna dik tak nei tur te, an rilru sukthlekte a ṭha lam hawia thlaka thlen chin aṭanga hmasawn zel tum turte leh hnam dangte tih theih ang ti ve zel thei an nihna hria a, lehpel thei tura ngaihtuahna seng turin a fuih.

NYK DYO Dinesh Jangid chuan Yuva Utsav huaihawt a nih chhan sawiin, "NYK hi India rama district 623-ah a awm a, ṭhalaite hmakhua ngaiin theihtawp a chhuah ṭhin," a ti.

Sorkar laipuia Department of Youth Affairs hmalaknain Yuva Utsav-India @ 2047 hi India ram state leh district hrang hrangahte buatsaih a ni. India ramin zalenna a hmuh theih nana hmalaknate bakah ram leh hnam hmangaihna ṭhalaite thinlungah thuk zawka tuh a nih theih nana ruahman a ni.