Hmun hrang hrangah World Water Day hmang

Lunglei

North East Initiative Development Agency (NEIDA) leh PHE department chuan Lungleia PHED conference hall-ah World Water Day 2023 an hmang a, bawrhsap Ramdinliani'n a hmanpui.

Ramdinliani chuan, khawvel changkang chho zelah ramngaw leh nungchate an chereu nasa tih a sawi a, "Ram kan tih chhiat leh hemi avanga boruak, sik leh sa danglam nasa lutuk veng leh siamṭha leh turin theihtawpa ṭan kan lâk a ṭul. Scientific management of land zulzuia agriculture leh a kaihhnawih hmalaknate pawh kan kalpui a hun tawh takzet a ni," a ti a, Lunglei Municipality huam chhungah bawlhhlawh paihna hmun atana ruat ni loa bawlhhlawh paih khap tlat a nih thu a sawi bawk.

He hunah hian March 6, 2023-a President hnen aṭanga National Water Warrior award dawngtu HS Lalawmpuii, Sairep, Lunglei district hnenah chawimawina hlan a ni.

Champhai

Project Management Unit (PMU), PHE department leh District Water & Sanitation Mission (DWSM) ṭangkawp chuan Champhai IPR Auditorium-ah World Water Day an hmang a, district bawrhsap James Lalrinchhana'n a hmanpui.

James Lalrinchhana chuan, khuarel mawina leh Pathian thil thlawn pek hrang hrangte humhalha tihpun a ṭul thu a sawi a, "A ṭha zawnga danglamna thlen turin keimahni ṭheuh aṭangin bulṭan a ngai. Khawvel pumah mamawh khawp tui dawng pha lo mi maktaduai hnih bawr vel an awm a, Champhaiah ngei pawh tunhma lam ngaihtuahin tui hnate a tlem zel a, khawpui tui tlan ber khawchhak Tuipui hna leh tui luang zat pawh a tlem tial tial," a ti a, Jal Jeevan Mission (JJM) hnuaia PHE department hmalakna hmanga tuilakna leh in tina tui pekna project kalpui a ni chu lawmawm a tih thu a sawi.

Kolasib

Minister K Lalrinliana, bialtu MLA hoin Kolasib Venglai Parish Hall-ah World Water Day hman a ni a; bawrhsap John LT Sanga hoin PHE department-a thawkte chuan tui hna humhalh pawimawhna auchhuahpuina kawngzawh an nei a ni.

K Lalrinliana chuan, United Nations in World Water Day 2023 thupui a thlan dan aṭang hian tui thianghlim renchem leh dahkhawl ngaih pawimawh a ṭul zia a lang tih a sawi a, "Tui chu a hmangtu kan pun zel avangin khamkhawp nei tur chuan buaipui nasat a ngai tawh a, a hman danah inrenchem leh ruahtui khawl ngaih pawimawh a ṭul. Mipui hriselna chu an tui tlan thianghlim leh thianghlim lohah thui tak a innghah avangin tui hnâr leh a chhevel khuaa chengte'n an bawlhhlawh an sawngbawl dan fimkhur taka kalpui ṭhin a ngai," a ti a, tui hna humhalh leh ruahtui khawl intihhmuh kawngah ṭanla turin kalkhawmte a chah.

Lawngtlai

Lawngtlaiah chuan World Water Day 2023 hi Lawngtlai PHED office complex-ah hman a ni a, Lawngtlai bawrhsap David Lalthantluanga, District Water & Sanitation Committee chairman ni bawk chu khuallian niin, World Water Day puala kawngzawh turte a vailiam.

David Lalthantluanga chuan, khawvel ṭhang chho mekah tui harsatna tikiang tura danglamna thlen turin mimal tin leh sorkar thawhhona a pawimawh thu a sawi a, "Khawvel hmasawnna kal mekah bawlhhlawh leh hnawm paih kawngah mipuite fimkhur a ṭul. Kan bawlhhlawh paih dan leh paihna hmun hian tuihna leh tui thianghlim kan neihna kawngah kawngro thui tak a su a ni," a ti

Mamit

Mamit Chhimveng YMA Hall-ah bawrhsap Lalnunhlua hoin World Water Day, 2023 hman a ni a, World Water Day puala veng fai leh tuikhur fai intihsiakna lawmman sem a ni.

Lalnunhlua chuan, tu leh fa, chhuan lo kal lehzel turte'n tui hman tur an neih zel theih nana hmalatu nih tum theuh tur leh midang hrilhhretu ni turin kalkhawmte a sawm a, "Kan ramngaw chereu zel hian tuihna a ti tlem a, kan bawlhhlawh paih fimkhur lohin kan tuilaknaah harsatna tam tak min thlen ṭhin. He'ng chingfel tur chuan department pakhat chauh thawh theih a ni lo a, kan zavaia ṭanrualna leh hmalak a ngai a ni," a ti.

Khawzawl

Khawzawlah chuan World Water Day hi Electric Br. YMA Hall-ah bawrhsap CC Lalchhuangkima hoin hman a ni a; nimin zing khan World Water Day pual kawngzawh niin, mi 50 chuang an tel.

CC Lalchhuangkima chuan tui renchem thiam a pawimawh thu sawiin, "Tui thianghlim hnárte kan dima kan humhalh loh chuan a kang zel dawn. Mizoram hi kan vannei a, ruahtui kan dawn ṭhat ber kum 2017-ah kumtluanin mm 2,253 vel kan dawng a, ruahtui tlak chhiat ber kum 2019-ah mm 2,000 mm kan dawng leh a, a tlangpuiin Mizoramin ruahtui kan dawn hi mm 2,000 a ni," a ti a, tun aṭanga ngaihtuahna sèn loh chuan ram danga tuia harsatna thleng ang chu thleng ve thei reng a nih thu a sawi.