Falkawn VC-in kar khat chhunga bungrua la chhuak turin phut

Falkawn Village Council chuan thuchhuah siamin, J Lalhmingliana, Kulikawnin an khaw ram chhungah dik lo takin ram a luah nia tarlangin, kar khat chhunga a bungruate la chhuak turin an phut.

Land Lease No Misc 23 of 1989, Falkawn ram chu J Lalhmingliana'n enkawlin Redwood Academy School a siam mek tih tarlangin Falkawn VC chuan, "He land lease, a neitu boral tawh hnu leh hawh hun chhung kum 30 ral ruala renew copy bak hmuh tur awm lo a Pu J Lalhmingliana'n kut a thlak hi Falkawn VC chuan ṭha a ti lo a, sorkarah kan dodalna kan thlen a, Mizoram mipui hmuhah kan puang bawk a ni," a ti.

MNF sorkarna hnuaia nihna leh mawhphurhna sang tak chelhtu J Lalhmingliana’n Falkawn hmuna ram a chin pawr dan chu Chief Minister pawhin hria se an duh thu leh dan anga hma la tura an phut thu Falkawn VC-te hian an tarlang a ni.