MJA-in Siaha-ah inkhawmpui an hmang

Mizoram Journalist Association (MJA) chuan Govt. Siaha College seminar hall-ah general conference vawi 49-na an hmang a, Mara Autonomous District Council (MADC) CEM M Laikaw in a hman pui.

MJA vice president Lalrem­siama kaihhruai inkhawmah M Laikaw chuan social media a chak tawh avangin, tlan pel tur chuan journalist-te an ṭan lehzual a ngaih thu sawiin, "Social media aiin in rintlak zawkzia in lantir a ngai. Mipuiin chanchinbute hi an rin zawk a, hriatna lâk nan an hman theih nan ṭan lâk a ngai hle," a ti.

M Laikaw chuan sorkar hotute'n journalist-te thurawn an mamawh tih sawiin, "Editorial leh article-te hmangin sorkar hotute leh mipuite'n ngaihdan leh thlir dan ṭha leh dik an neih their nan thurâwn in pe thei a ni," a ti a, an rilru leh news cover chin tihzau a nih chuan journalist-te hlutna a belhchhah tur thu a sawi.

Thusawitu dang MJA presi­dent C Lalrambuatsaiha chuan Covid-19 lengin journalist-te a nghawng na hle tih sawiin, "Sorkarin chanchinbu a lâk zat a tihniam a, adver a titlem a, kan harsa tlâng. Kan hun tawn mek hi kan hriat chian a ngai a, engtia kal zel tur nge kan nih tih kan ngaihtuah a ngai. Teirei peih a ngai a, teirei peihna hian hlawhtlinnaah mi a hruai ṭhin," a ti.

MJA President chuan social media-in print media-te a nêk mek tih sawiin, "India ramah hian print media a la tlahniam lo nia sawi a ni a, Mizoramah kan tlahniam ta si. Chanchinbu hlawhtling ni tur hian terei peih leh taimak a pawimawh," a ti a, tuna an harsatna tawh chuan an fuat eng chin nge tih a rawn finfiah dawn thu a sawi.

MJA inkhawmpuiah hian chawhnu lamah MJA President kaihhruaiin rorel inkhawm neih a nih bakah, resolution pahnih an pass. MJA-ah hian member 198 an awm mek a ni.

MJA RESOLUTION
1. Mizoram sorkar hian advertising & publicity-ah tun aia tam zawk sum min dahsak rawh se.

2. Chanchinbu subscription bill leh advertisement bill awlsam zawka lâk a nih theih nan sorkarin hma min laksak rawh se.