April 18-ah MADC VC inthlan

Nimin khan Mizoram state election commissioner (SEC) Laima Chozah chuan Mara Autonomous District Council (MADC) VC inthlan hun atan April 18, 2023 ruat a nih thu a puang.

Laima Chozah sawi danin, kum 2008 khan Mizoram State Election Commission din niin, MADC VC inthlan chu kum 2015 aṭangin an kutah dah ṭan a ni. Tun ṭumah hian MADC VC term tawp hmain inthlan hi buatsaih a ni dawn.

MADC hnuaiah hian VC 99 awmin, inthlan buatsaih tura hman tur electoral roll chu March 17, 2023 khan tih­chhuah a ni. VC 99-ah hian voters mipa 20,794 leh hmeichhia 22,326, an vaiin 43,120 an awm.

VC 99-ah hian member 591 an awm dawn a, chung zinga 99 chu thlan tur ni loin sorkarna siamtu party-ten an ruat tur a ni. Mipuiin VC member an thlan tur zat chu 492 niin, chung zinga 99 chu hmeichhe tana seat dah a ni.